KA KOT REP

B.M Pugh

[ba bteng] U sohmyndong rit lane u ‘kagzi’ u long u soh myndong uba ngi shait shem eh ha iew ha hat ha kane ka ri India. Une u long u soh uba heh kumba 2 inshi ne duna, uba stang bha ka snep bad uba stem bha. Une u soh u long bha ha ki jaka ha kaba ka khyndew kam da sboh eh; bad um da donkam eh ka jingsumar kum kiwei kiwei pat ki sohjew sohthiang. Kaba phylla ka long ba ia une u soh haduh mynta ki nongrep ha ri Khasi-Jaintia imat kim da suidnew eh ban rep ia u. Ia une u jaid sohmyndong ki thung ha kylleng ki jaka ka ri India; hynrei na ki jylla kiba kham thung bha eh ia u, ka Madras ka long kaba nyngkong. Kane ka jylla ka don kumba 12 hajar ekar (acre) une u soh.

Ha Bengal don tang kumba shi hajar ekar (acre) shiteng une u soh. Ha kane ka jylla imat don ar jaid kine ki sohmyndong; uwei uba kham shalyntuin bad uba kham stang bha ka snep bad uba ki khot u ‘kagzi nimbu’, bad uwei pat uba pyllun bad uba ki khot u ‘pati nimbu’. U sohmyndong jew imat u long uba kham heh ia utei haneng; ka snep ruh ka kham rben shibun bad ka kham sohkhrut bad ka um ruh ka kham bun bad ka kham jew. Une u long u jaid sohmyndong ba ngi ju kham shem ha ri Khasi-Jaintia bad ha kiwei kiwei ki jaka lum jong ka ri India, bad ha ki jaka thor ruh kum ha Agra bad Farrukhabad ha ka jylla United Provinces. U sohmyndong thiang u long uba ki thung malu-mala ha Madras bad ha Punjab. Une u soh u long uba kham rit bad pyllun. Ka dohmet ka lieh bad ka bun bha ka um kaba thiang. Ha jylla Madras ki thung ia une mynta ha kine ki distrik, Malabar, Salem bad Nilgiri. Ha Punjab ki thung ia une ha kine ki distrik; Lahore, Lyallpur bad Sheikhupura. U Sohmyngngor (California) U sohmyngngor California (Citrus paradisi) uba ki khot ha ka ktien phareng ‘grapefruit’, u long u soh uba dang wan shen sha kane ka ri na America. La khot ia u kumta namar ba u mih haduh lai saw ha ka shi rynjup kum ki soh ‘grape’. Une u soh lehse u mih na u sohmyngngor ha ki dewlynnong West Indies. La ngeit ba u long u soh uba dang mih shen. U soh u iasriem eh ia u soh khyllah, bad lehse u dei tang uwei u jaid jong u. Kum u sohmyngngor pat u don ar jaid (1) uba saw hoin (pink) ka dohmet bad (2) uba lam stem ka dohmet.

Dang shen la wallam ia u sha kane ka ri India, bad u iadei bha ha Punjab bad ha Sind. Hynrei kat ha ki jaka kiba la pyrshang ia u ha kane ka ri, u long bha khlem jingshitom. Nga ngeit namarkata ba une u dei ban long bha ha ri Khasi-Jaintia. Ki variety, kata ki jaid jong une u soh kiba la poi sha ka ri ki long kine; Marsh’s Seedless, Triumph, Duncan bad Foster. Ka Allahabad Agricultural Institute ha Allahabad ruh ka thung bha ia une u soh bad u iaid bha ruh. U long u soh uba bang-pyngngad shibun ban bam. Kito kiba kwah ban ioh jingtip shuh shuh shaphang ki sohjew sohthiang ki lah ban pynioh ia kine ki kot ba la ai kyrteng harum: 1: Hume, H.H – The Cultivation of Citrus Fruits (The Macmillian Company, New York) 2: Fawcet, H.S and Lee, H.A – Citrus Diseases and Their Control (Mc Graw-Hill Book Company, New York) 3: Quayle, H.J – Insects of Citrus and other Subtropical Fruits (Comstock Publishing Company, Ithaca, New York) 4: Report on the Marketing of Citrus Fruits in India – Manager of Publications, Government of India Press, Delhi.

LYNNONG – 22

U SOHTRUN Une u soh imat u long uba wan nyngkong-nyngkong na Brazil ha South America. Imat u la wan poi sha ri India ha ka snem 1548. Bad la um pat roi stet ha kane ka ri kumba u la roi ha kiwei pat ki ri, kum ha ki dewlynnong Hawaii, Malaya, West Indies, South Africa bad Queensland, la katta ruh ngi shem ia u ha bun ki jaka ha kane ka ri India kum ha Assam, Bengal, Malabar bad ha ri rud duriaw jong ka Bombay Presidency. Na kitei ki jaka baroh, ka Singapore ha Malaya bad ki dewlynnong Hawaii ki long ki jaka kiba rep bha ia une u soh namar ba ki don ki karkhana kiba heh kiba thep ia une u soh ha ki tin bad kiba phah ia u sha kylleng ka pyrthei. Ka ri Khasi bad jylla Assam baroh kawei ki long ki jaka kiba bit eh ban rep ia une u soh lada ki lah ban thep ia u kumta ha ki tin kumba ki leh sha kiwei pat ki jaka. Kane ka long kawei na ki indostri (industry) kaba ki Khasi-Pnar ki dei ban pynieng. Une u soh u long bha ha ki jaka ki bym da shit eh, bad um da long bha satia ha ki jaka kiba khriat. Ka jingshit jong ka bneng kaba naduh 60 degree haduh 90 degree (Fahrenheit) imat ka long kaba ia dei bha na ka bynta une u soh. Dei na kata ka daw ba nga ngeit ba ki jaka ri War bad ri Bhoi jong ngi ki dei ban long kiba bit eh na ka bynta une u soh. Um lah ban shah ia ka jingshit eh jong ka sngi, hynrei um lah pat ban long bha lada shar eh ki dieng. Une u soh u lah ruh ban long bha ha ki bun jaid ki khyndew; hynrei u iadei bha eh ha ka khyndew ka bym da shyiap eh lane ka bym da skhah eh. Imat kam da donkam ruh ba ka khyndew ka dei ban long kaba da sboh eh. Don kiba ngeit ba u soh uba na ka khyndew ka bym da sboh eh u long uba kham bang. la u soh na ka khyndew kaba sboh bha u lah ban long uba kham heh. Imat une u soh um da long bha eh ha ki jaka kiba duna ka nar bad kiba bun eh ka shun. Ka khyndew ka dei ruh ban long kato ha kaba ka um kam lah ban neh slem. Namar kata ki jaka sharing ki lah ban long kiba kham bha. [yn dang bteng]