KA KOT REP

B.M Pugh

[ba bteng] Na ka sla bad u jyntang pat ki shna ki prewkiba rit kiba ki lah ban thang ha iing ha sem khnang ban pyniap ia ki khniang kum ia u kain pyrjong bad kiwei kiwei ki khniang. Nga la pyni ha ka lynnong shaphang u phan ba ka dawai kaba ki ioh na une u jingthung ka long kaba lah ban pyndonkam ban pyniap ia ka niangpulit kaba bam ia u phan. Ha ki katto katne ki jaka ha Africa ki la pyndonkam ia u pawdar jong une u jingthung ban pyniap wat ia ki khniang kiba bam ia u dieng bad ki sla kophi.

Uwei u Mr. Le Pelley u la shim ka umphniang sharak kaba bha (of high flash point) bad u la theh ia ka suki-suki halor u pawdar pyrethrum kum ban jiar ia ka, nangta u sa pyndonkam ia ka ban synreit hapoh ka jain kaba tap ia u dieng kophi khnang ban pyniap ia ki khniang kiba pynjulor ia u. Lada pyndonkam da ka umphniang sharak kaba sniewkane ka lah ban pyniap ia ki sla. U pyrethrum u long u jingthung uba itynnad, lah ban thung ia u kum u syntiew ruh. Une u iadei kur jan eh bad u syntiew Chrysanthemum. Ka kyrteng saians jong u ruh ka long Chrysanthemum roseum bad Chrysanthemum cinaratioefolium, ki ar jaid ki pyrethrum kiba ki ju rep. La khot ‘roseum’ ia utei uba nyngkong namar u don ki syntiew kiba saw, uba ar pat u don ki syntiew kiba lieh. Une uba ar imat u kham bha ban ia uba nyngkong. U pyrethrum u lah ban jrong haduh kumba shi phut shiteng ne. U pyrethrum u long bha ha ki jaka kiba khriat bad ha kiba jrong palat ia ka 4500 phut halor ka sla duriaw. Kata um long ha ka ri War ri Bhoi lane ha ki ri thor. U long u jingthung uba ki thung bha ha Japan.

Dei na kane ka daw ba ka jingrep pyrethrum ka la roi stet ha kane ka ri India bad ha ki lum Khasi ruh, namar ba ym lah ioh shuh ia u pawdar pyrethrum na kiwei-kiwei ki dawai kiba ki shna na une u jingthung katba ka dangneh ka thma. Ki kham rep pyrethrum ruh ha Kenya (Africa) ha ki lum jong kata ka jaka. Hangne ha ri India ruh ki la kham rep bha ia une u jingthung ha Kashmir bad kiwei kiwei ki jaka lum jong kane ka ri. Une u jingthung u long ha ki khyndew ki bym da sboh eh. U lah ruh ban long hajan poh ki dieng kum ki dieng soh peach lane wat ki dieng kseh ruh. Lada ka khyndew ka long kaba sboh eh ki lah ban kham duna, hynrei ki sla kin kham bun. Ia une u jingthung lah ban thung na u symbai lane da ki khun kiba lah ban pyniakhlad na u kmie. Imat ka kham bha bad ka kham stet ruh ban pynroi da kaba thung da ki khun kiba shu pyniakhlad na u kmie. Lada thung da u symbai, lah ban thung ha u bnai March-April lane ha u bnai September-October. Ha ri Khasi imat ka kham bha ban thung ha u bnai March. U symbai u leit kumba shi pound ha ka shi ekar. Shuwa ban thung ki da pdem ia u symbai hapoh um katto-katne kynta, hadien kata ki sop ia u ha ka byrni bad ki tep hapoh khyndew kumba 4 ne 5 sngi.

Hadien kata pat ki sa khleh bad ka khyndew bad ki sa ber ha ka jaka sara. Ia ki sara lah ban pynkynriah sha ka lyngkha ha u bnai April-May-June. Ha lyngkha ki thung ha ka jingjngai kumba shi phut shiteng uwei na uwei. Ha ri Khasi-Jaintia une u jingthung u lah ban long khlem da ai um (irrigate), kata tang ka um slap ka la biang. Ynda kumba lai pawa na ki syntiew ki la sdang ban plie, kata ka por ban kheit ia ki syntiewka la poi. Lada ym kheit ia ki ha ka por kaba biang kata ka jingmih ruh ka duna bad ka jingbha jong u syntiew na ka bynta ban shna dawai ruh ka duna. Lah ban ioh haduh kumba 5 mon u syntiew na ka shi ekar. Ynda la lah kheit ia ki syntiew ki thad pynrkhiang ia ki ha ka sngi bad ki sa die ia ki tang shu lah pynrkhiang.

LYNNONG – 21 U SOHNIAMTRA, U SOHMYNDONG BAD KIWEI KIWEI KI SOHJEW KI SOHTHIANG Ha kane ka lynnong ngan thoh shaphang u sohniamtra, u sohmyndong bad kiwei-kiwei ki soh kiba iadei kur bad ki, bad kiba lakhot lang ha ka ktien phareng ki ‘citrus fruits’ (kynnoh sitros phrut). Kine ki jait soh imat ki mih nyngkong-nyngshap ha kane ka ri India. U Professor Tanaka, u Japanese uba tip bha shaphang kine ki jaid soh, u ong ba kine ki jaid soh baroh ki mih nyngkong-nyngshap ha Assam, lane ha ka ri War jong ka ri Khasi bad Jaintia, bad nangne ki la phriang kylleng ka pyrthei. Ka jingbun jong kine ki jaid soh ha ri War jong ngi imat ka long ka sakhi kaba khlain bha ba kine ki jaid soh ki lah kumta ban mih ha ki ri them jong ka ri Khasi bad Jaintia. Ngi don ha ri War u sohniamtra, u sohmyndong, u sohniangriang, u soh kwit, u sohmyngngor, u sohpai, u sohmat, u sohsyiem, u sohsying, u sohlong, u sohkhyllah, bad kiwei kiwei kiba ka pyrthei shabar ka ri Khasi kim pat tip. Ka pyrthei ka dang ap ia u riewstad, lehse na ri Khasi, uba lah ban wad kham bniah ia kine ki soh bad u ban pynithuh ia ki sha kiwei pat ki jaid bynriew jong ka pyrthei. Ki ri jong ka pyrthei kiba kham thung bha ia kine ki jaid soh ki long kine: ka ri Amerika, ka Brazil (South America), ka Spain, ka Italy, ka China, ka Japan, ka India, bad ka ri Kanaan (Palestine).

Na kitei ki jaid soh baroh kiba nga la jer kyrteng hangne, uba ki kham thung eh ha kitei ki ri jong ka pyrthei u long u sohniamtra. Uba bud pat ia u sohniamtra u long uba ki khot ha ka ktien phareng u ‘grapefruit’. Une u syriem eh ia u sohkhyllah. Imat u la mih kumno-re-kumno na utei, bad ynda hadien u la leit poi sha America ha kaba ki la pynroi bad bam bha ia une, bad mynta u la phriang kylleng ka pyrthei; bad lehse ka jingwan jong u mynta sha ri India ka long ka jingwan kylla biang sha la iing ynda u la pyndonkam ialade ha kylleng ki ri ka pyrthei. Uwei pat uba ki kham rep na kitei ki jaid soh u long u sohmyndong. [yn dang bteng]