KA KOT REP

B.M Pugh

LYNNONG -12

U DUMASLA

[ba bteng] U dumasla u long u jingthung uba u nongrep ha ri Khasi-Jaintia u lah ban ioh jingmyntoi shibun eh. Nga ngeit ba ka jaka ruh ka long kaba iadei eh na ka bynta une u jingthung. Kaba donkam ia u nongrep ha ri Khasi-Jaintia ban tip ka long kumno ban shna dumasla na une u jingthung. La katta ruh ngan thoh katto-katne shaphang une u jingthung shuwa ba ngan batai ia ka rukom shna dumasla na ki sla jong u.

U dumasla u long u jingthung uba la wanrah sha kane ka ri India na ka ri Amerika. Shuwa ban shem ia ka ri Amerika ki briew kim ju tip ia ka dih duma lane dih sikret ne dih shrut (cheroot). Hynrei hapdeng khyndiat spah snem ka jingdih sikret ne dih duma ka la phriang kylleng ka pyrthei bad mynta u dumasla u la long uwei na ki jingthung kiba kongsan tam jong ka pyrthei. Ki ri kiba pynmih bun eh u dumasla ki long kine: China (1400 milian pound), India (1375 milian pound), United States of America (1155 milian pound), Russia (600 milian pound) bad kiwei pat ki ri jong ka pyrthei (kumba 1890 milian pound). Na kane ngi lah ban iohi ba ka ri India ka long kawei na ki ri kiba rep bha ia u dumasla, bad u long ruh ha man la ki jaka ha ka ri India. Ka jingpynmih ha ri india ka long kumne: Bengal (322 milian pound), Madras (285 milian pound), United Provinces (228 milian pound), Bihar & Orissa (112 milian pound), Bombay (108 milian pound), Punjab (86 milian pound), North-West Frontier Provinces (34 milian pound), Assam (14 milian pound). Kumta na ki jylla jong ka ri India baroh ka Assam ka long kaba kham duna ha ka jingpynmih dumasla. kane kam dei namar ba ka jylla Assam ka long ka jaka ka bym bit ia ka ban rep ia une u jingthung, hynrei namar ba ka jylla kam pat nang kumba nang kiwei pat ki jylla ha ri India ia ka ban shan dumasla na ka sla jong une u jingthung. Kane ka long kaba shisha khamtam ia ka ri Khasi-Jaintia jong ngi. Ki Khasi bad ki Pnar kim pat nang satia ban shna dumasla.

Don ar jaid ki jaid dumasla ba ki thung na ka bynta ba ki pyndonkam ha kaba dih duma bad dih sikret bad kiwei kiwei ki jingdonkam. U jaid uba ngi shait kham shem eh ha Bengal bad ha ki jaka kiba kham shatei jong ka ri India u long uba ki la jer kyrteng saians (scientific name) u Nicotiana rustica. Une u jaid u don u syntiew uba jyrngam stem. U long ruh uba khain bad uba mih khah ki sla. Uwei pat u jaid dumasla uba ki khot Nicotiana tabacum bad uba ki ju kham thung ha ki jaka kiba shaphang shathie jong ka ri India u don ki syntiew kiba lam byrsaw (pink), bad uba kham jrong ka rynnieng ki sla ruh ki kham nep bad kham stang ban ia ki jong utei uba nyngkong. Ia ka sla jong u Nicotiana rustica ki shait pyndonkam ha kaba shna duma dih, lane duma bam ( chewing tobacco) lane ha kaba shna duma duma ban iw (snuff). Ia ka sla jong u Nicotiana tabacum pat ki ju pyndonkam ban shna sikret, lane cigar, lane u shrut (cheroot), lane biri, lane na bynta ban shna duma dih bad kiwei kiwei pat ki jingpyndonkam.

La u dumasla u long ha kylleng ki jaka jong kane ka ri India, hynrei u long kham bha ha ki jaka dew kynroi (open soils) ha kiba ki thied jong une u jingthung u lah ban ngam jylliew. Kam da donkam eh ba ki khyndew kin da sboh eh namar lada bun eh ka naitrojen ka sla ka kham rben bad namarkata kam long kaba da bha eh, khamtam na ka bynta u dumasla uba ki shna sikret. Na ki khyndew kiba kham sboh, lah ban thung tang ia u dumasla na uba mut ban shna duma dih. Ki khyndew kiba don shibun ka potash, ka phosphorus bad ka nar ki long kiba bit eh na ka bynta u dumasla.
Ki symbai dumasla ki long kiba rit katta katta namar kata dei ban da shu sara, shuwa ba kin thung ha lyngkha. Ki jaka sara ki dei ban long ha ka dewkynroi (well-drained and friables oil), bad kiba lait na ki kynja niut baroh. Namar ba ki symbai ki long kiba rit eh, ki ju khleh ia ki bad ka khyndew lane bad u dpei shuwa ban bet ia ki khnang ba ki symbai kin ym lang eh tang shi jaka. Kane ka jaka sara ka dei ban long kaba sngem, hynrei kam dei ban long kaba ktieh. Khnang ban kiar ia kane ka jaka sara na u lap kyrthep, donkam ban da tap ia ka da ka jingsop kdait ne sder kaba niar. Ia kane ka jingsop, ka bha ban pynkynriah mynsngi khnang ba ki sara (seedlings) kin ioh sngi. Kane ka pynkhlain ia ki bad ka pyllait shibun na ki katto katne ki jingpang kiba ju kem haba ki dang rit. Lada ki la khapngiah eh ruh, donkam ban pynkynriah jaka noh katto katne khnang ba kiba dang sah kin kham khlain.

Ynda kine ki jingthung ki la speh ki sa pynkynriah ia ki sha lyngkha. Ki ju thung ia ki jngai kumba ar phut shiteng ha uwei ha uwei pat u jingthung. Tang shu lah thung ia ki, dei ban ai um, lymda kumta ki lah ban iap. Ynda la thung ia ki ha lyngkha, ym da donkam eh shibun ka jingsumar lait tang ban thiew ia ki niut lane ban shu kynroi ia ka khyndew. Khnang ban ioh u dumasla uba bha, ki ju dykhat noh da kaba shu shyit ia ki kliar jong u jingthung dumasla, kata ia u shylluit na uba u phuh (inflorescence) bad une un sa mih pat hadien. Da kaba leh kumne ka jingbam kaba dei ban leit sha ki sytiewka leit sha ki sla. Ia kaba shyit (topping) kumne, ki ju leh kham kloi na ka bynta u dumasla duma dih bad kham dier ia u dumasla sikret, namar kaba shyit ka kham pynrben ia ki sla. Khyndiat sngi hadien kaba shyit ki ju mih shibun ki tnat lung (suckers). Ia kine ruh dei ban pynkhuid noh ka met jong u dieng dumasla da kaba shu shyit lymda kumta ka jingbam jong u jingthung kaba dei ban leit sha ki sla ka noh sha kine ki tnat. [yn dang bteng]