KA KOT REP

B.M Pugh

[ba bteng] Ka doh jong ka ruh ka long kaba bha bad kaba tei ia ka met u briew. Ka doh blang ka kynthup ia kine harum:-

1. Moisture – 74.2%
2. Protein – 21.4%
3. Fat – 3.6%
4. Minerals – 1.1%
5. Calcium – 12 0 mg/100 gms
6. Phosphorous – 139.0 mg/100 gms
   Halor jong kine ki jingshisha ba la kdew haneng, ka kam ri blang ka long kawei na ki lad ban pynroi ia ka ioh ka kot jong u nongrep.
   LYNNONG – 4: U JINGTHUNG UBA BHA
   Kawei kaba donkam eh ia u nongrep ban sngewthuh ka long ba ym dei tang ba don bun jaid ki jingthung ha kane ka pyrthei. Kum u phan, u riewhadem, u kubi bad kiwei kiwei; hynrei ba don bun ki jaid kiba iapher-iapher ha ujuh hi u jingthung. U nongrep ha ri Khasi-Jaintia un sngewphylla ban tip lehse ba don wat tang hapoh Assam hi la kumno-kumno kumba shihajar ki kba kiba iapher uwei na uwei. Ha ka ri India jong ngi baroh kawei don lehse kumba lai ne saw hajar ki jaid kba kiba iapher -iapher. Kumjuh ruh don bun jaid ki phan ha kane ka pyrthei. Kumta don ki jaid kiba kham bha ban ia kiwei pat. Kaba donkam eh namar kata ia u nongrep ka long ban thung tang ia uta u jaid (variety) uba bha tam. Ka long ka kam jong ka sorkar ban wad ia kine ki jaid kiba bha tam na ka bynta kano kano ka jaka; bad hadien kata, ban pyntip ia ki nongrep jong kato ka jaka ba ki don u jaid jingthung uba bha tam na ka bynta ka jaka jong ki. Lada phi thung phan phi dei ban thung da uba bha tam, bad lada phi thung riewhadem ruh phi dei ban thung da uba bha tam. Lada phim tip ia u jaid uba bha tam jong u jingthung jong phi, kylli na ka sorkar. Kumjuh ruh ki don ki jaid (variety) diengsoh kiba bha tam, ki jaid kubi kiba bha tam; bad ki sorkar jong ki ri ha kylleng ka pyrthei ki wad ia ki jaid jingthung kiba bha tam haduh ba kin da shem ia ki. Bunsien ka kam kam long kaba jem ban shem kum ia uta u jingthung, bad ka jingwad kam kut trai shuh . Don ruh bun ki nongrep kiba shemphang kiba la lah ban shem ne ban pynmih ki jaid jingthung kiba kham bha ban ia kiba ka sorkar ka la shem ne ka la pynmih. Ngi ngeit ba don bun kiba kum kita wat mynta ha ri Khasi-Jaintia ruh, ki nongrep kiba tip bha uba kumno u jaid u long uba bha tam na ka bynta ka jaka jong ki.
   Don ar lai ki rukom kiba u briew u lah ban leh ban ioh ia ki jaid jingthung kiba kham bha. Kaba nyngkong ka long ban wad na kylleng ka pyrthei ia ki jaid (variety) jong uta u jingthung uba ki kwah ban ioh. Kane ka long ka kam jong ka sorkar; bad ka ruh ka dei ban pyndonkam na ka bynta kane da ki briew kiba stad bad kiba sngewthuh. Kaba nyngkong kaba kine ki riewstad ki leh ka long ban wad jingtip hangno une u jaid jingthung u mih nyngkong eh. Khnang ban ioh ia u phan uba bha tam, ki Russian ki la phah ia ki riewstad sha ka America kaba shaphang shathie, sha ki ri ha kiba u phan u mih nyngkong eh, bad kine ki la wad bniah ia ki jaid phan baroh kiba don ha kato ka jaka. La ong ba ki Russian ki la shem bun jaid ki phan hangta, bad don katto-katne kiba ka jingpang iap iong (potato blight) kam lah ban leh ei-ei ia ki. Katno kan long ka jingkyrkhu ia ka ri Khasi-Jaintia lada ngi lah ban ioh ia kita ki jaid phan. Tangba kita ki phan la ki lah ban ialeh pyrshah ia ka iap iong kim long barobor kiba lah ban pynmih shibun u phan. Kane ka long kawei pat ka jingeh kaba ki riewstad ki dei ban ialeh. Mynta hangne ha ri India jong ngi ruh ki la ioh symbai na kita ki phan kiba lah ban ialeh pyrshah ia ka iap iong,, bad ki dang pyrshang (test) ia ki ha ka “Potato Research Station” kaba ha Simla, bad ki dang pyrshang ban pynmih ia ki ki jaid phan kiba lah ruh ban pynmih shibun u phan. Kane ka long ka rukom kaba ki sorkar kiba peitmat ki pyndonkam khnang ban ioh ia ki kynja jingthung kiba bha tam.
   U nongrep uba sngewthuh u lah ban pyndonkam ia katei ka rukom da kaba wad ia ki jaid jingthung kiba iapher-iapher na ki jaka na kylleng ka ri India bad ban pyrshang ia ki ha la ka lyngkha. Kane ka long kaba shitom ia u nongrep uba rit ban leh; hynrei ia u nongrep uba don shibun ka khyndew hapoh uta uwei u jingthung, ka lah ban long kaba myntoi shibun eh. Don mynta bun jaid ki kba, bun jaid ki pai, bun jaid ki phan, bun jaid ki kubi, bun jaid ki sohbaingon saw, bun jaid ki phan karo, bun jaid ki salad (lettuce), bun jaid ki sohpieng bad kiwei kiwei ki kynja jingthung.
   Kaba ar pat ka rukom kaba lah ban leh, khnang ban pynmih ki jingthung kiba kham bha, ka long da kaba shu jied na ki jingthung kiba la don lypa. U nongrep uba stad, da kaba peit ha lyngkha, u lah ban ithuh uno u jingthung uba bha eh ha ka lyngkha jong u; u buh kyrpang ia u, bad ha uta u pynroi ia ka jaid (variety) kaba thymmai jong uta u jingthung. Kane ruh ka donkam ia ka khmat u briew uba sngewthuh bha shaphang ki jingthung. Da kaba leh kumne ki riewstad ha ka rep ki la lah ban pynmih shibun ki jaid jingthung kiba kham bha ban ia kiwei pat ki para jingtung. U briew uba la leh shibun eh ia kane ka kam ha ka ri India jong ngi u long u Sir Albert Howard. La iarap ia u ha kane ka kam da ka tnga jong u, ka Gabrielle L.C. Howard. Mynta ha ri India don bun ki jaid kew, bad kiwei -kiwei ki jaid jingthung kiba kine arngut ki la pynmih (evolve) da kaba shu jied kumne. Ha ka jylla United Provinces pat, u riewstad ha ka rep uba la pynmih shibun ki jaid jingthung da kane ka rukom u long u Rai Sahio Ram Prasad Singh. Une u riewstad um shym da shong skul shibun eh. Lehse ia ka matrik (matriculation) ruh um pat pass. Hynrei u l;a nang ia kane ka kam da kaba iatrei bad uwei u Saheb uba kyrteng u Dr. Leake; bad hadien kata u la pynmih uwei u jaid kynphad uba bha (Cawnbore 520), uwei u kew uba bha (Cawnpore 13), bad uwe u barli (barley) ruh uba bha shibun (Cawnpore 251). Ia kine mynta la thung ha kylleng ka jylla United Provinces. [yn dang bteng]