Ka kot ‘Ki Jingkynshew ba kor’ la thoh da u Pastor P. Nongshli

Nongpoh: Ka kot ‘Ki Jing kynshew ba kor’ ia kaba la thoh da u Pastor P. Nongshli, la pyllait paidbah noh hynnin ka sngi hapoh ka Iingmane ka Balang Presbyterian ha Nongpoh.

Ia katei ka Kot la pyllait paidbah da u Pastor B.R Pamshong, Pastor Rangbah ba la shongthait ha Ri Bhoi, ha ka jingiadonryngkat u Pastor P. Nongshli, u Tbn. T. Nongkhlaw, kiwei ki Pastor, ki Tymmen Basan, ki baha iing lem bad kiwei.

Haba kren halor katei ka Kot ‘Ki Jingkynshew ba kor’, u Pastor P. Nongshli, u la ong ba ka nongrim kaba la pynlong ia u ban thoh ia katei ka kot, ka long kum shibynta ban pynsngewthuh janai shaphang ka jingieid u Blei bad kumjuh ruh haba iadei bad ki Jingainguh ne ka jingai sha ka kam u Blei.
U la ong ruh, ba kum u Pastor, nalor ka kam ialap ia ka ktien u Blei ha ki Pulpit bad ha ki Rynsan Ialap, hynrei ka donkam ruh ban ban thoh ia kiba kum kitei ki Kot, kiba long kum ka jingialap ia ka ktien u Blei lyngba ka thoh ka tar.