Ka Kopati Puja ka jingai nguh ia u Nongbuh Nongthaw

Mr. Hamjhan H. Dkhar, Raliang

Ha shwa ban sdang ka Kopati Puja Raij Raliang baroh ki khun ka Raij u shnong u thaw u la lum lang ia u kba u khaw na lyngkha risa da ka Nguh ka dem Blei ban poi suk poi saiñ u kba sha la ïing trep ban pyndep ia ka dung khoowner da ka nguh ka dem da u ne ka ba pan chiar ryngkat bad ka Raij hangta keiñ la riew ka ksing ka dhah ha shnong ha thaw kum ka dak ba la poi ka Kopati Puja, baroh ki samla samhoi ki la ia tem ka ksing ka bom man la ka janmiet ki pynsawa jam ia ka, bad ki la ia bun kam bha ha ka ban hikai Mastieh ha ïing u Lyngdoh (ïing Raij) bad u Wamon, khnang ba kin lah bha ban Mastieh ha kata ka sngi. Ha kane ka jingtem ksing bad Mastieh Niam dei tang ki shynrang, namar ki khynthei ki don la ka jong ka bynta.

Ka Kopati Puja Raij Raliang kaba ju long man la u snem, mynta u snem ruh kan pynlong ia ka ha ka 25th -26-th -27th Nov, 2019 ha shnong Raliang, bad ha ka 26th kan long ka sngi kaba khraw, namar ha kane ka sngi kan don ka jinglehniam naduh ka por mynstep, bad ha ka por mynsngi kan don ka jingshad Niam Tynrai. Kane ka Kopati Puja ka long ka jinglehniam bad ka jingai nguh ia u Nongbuh Nongthaw uba la buh bad sam bynta ia u khun bynriew ha jrong ka mei ramew.

Ia kane ka jinglehniam Kopati Puja la pyndep ia ka Niam hapoh ka khlaw Blei (Khlow Blai) kaba don ka duwan kñia hapdeng shnong, bad ha dien nangta pat la shad Mastieh hangne hi naduh u Wamon, u Lyngdoh, u Dolloi, u Pator, ki 7 Rangbah Kur bad na ki Raij kiba ia don bynta lang ha kane ka Kopati bad na ki samla bapher bapher, bad hadien nangta u Soh-Blei u la leit ban ai nguh ia u syntiew Blei sha ka wah Um-ïurem ryngkat ki longkpa bad samla, bad hadien ba la wan phai nangta la ioh pat ka shad Niam Tynrai na ki khun Niamtre ha madan Sein Raij Chrah Umphula ha man la ki dong bad kyntoit jong ka Shnong Raliang, bad na Laskein, na Nongkynrih, na ki Raij bapher bapher ban pynphuh pynphieng shuh shuh ia kane ka jinglehniam. Hadien ba la kut ka shad Niam Tynrai na ki khun Niamtre la ioh pat sa ka shad Niam Mastieh ha phyllaw ïing u Wamon ha ryngkat ka ksing ka dhah na u harmuid, ki dhulia bad ki samla kiba bat Niam.

Ia ka Kopati Puja la juh pynlong ia ka ha man la u bnai November man la u snem hadien ba la dep ot ia u kba u khaw na lyngkha risa kaba la dep trei baroh shi samoi, kaba u Kynrad u la ai bad pyndap smam ia u thiar jong ngi baroh saw aiom, bad u ba la ai ia ngi hapdeng ka jingkoit jingkhiah krad haduh ba ngi la lah ban lum ban lang ia u kba sha la ïing. Ha kane ka jinglehniam la don kum ba san tylli ki Raij kiba pyndep bad ban ai nguh ia ka Kopati Puja jong ka Riaj Raliang, naduh ka Raij Raliang, ka Raij Khonshnong, ka Raij Niawkmai, ka Raij Ionglang, bad ka Raij Lapnei. Ka jinglehniam ia ka Kopati Puja ka long haduh lai sngi lynter naduh ka sngi Nartiang, Musiang, bad Mushai, ha kine ki ar sngi lynter baroh shi shimiet ia shad ia kmen ia risa kynhoi ki samla shynrang bad Rangbah ha ryngkat ka ksing ka dhah bad kiba bat niam, la pyllong ia kane ka Kopati Puja ka long ban duwai phirat ban dup ioh ka shait ka khlain, ka manbha ka man miat ka trei ka ktah, ka pule ka puthi ka spah ka phew, bad ha baroh ki liang ha ka long briew man briew.

Kopati Puja Wasuk iaphi.