Ka Kong Macdalyne, kam pat bit, ban long nongialam, ong u heh NPP

Nongpoh:U Bah Plielad Tiewsoh, uba la dei uwei na ki nongialam ka NPP bad uba la bat ia ka kyrdan nong ialam kum u President ka seng National People’s Party (NPP) ha Nongpoh Con stituency bad ha kajuh ruh ka por kum u Vice-President ka NPP ha Ri Bhoi, u la pynbna ialade ba u la iehnoh noh na ka Party.

Ka kyrwoh kaba la phah da u Bah Plielad Tiewsoh, la ong ba ha kine ki bnai kiba la dep, la don ka kynhun hapoh ka Party NPP, kiba ym kwah ia u ba un long kum u nongialam bad lyngba kitei ki kynrum kynram, kaba la pynlong ia u ba un ngiah noh ban trei ne ban ialam ia ka Party bad hadien kata, u la lap bad shem ba ka Kong Macdalyne S. Mawlong, MDC Umsning bad kaba dei ka Kyrtong ka NPP na Nongpoh, ka dei ka briew kaba ym lah ban shim rai tang nalade.

Lyngba katei ka kyrwoh, la pynpaw ruh ba katei ka jingbymlah shimrai da katei ka kyrtong jong ka NPP na Nongpoh, ka la pynartatien eh ia utei u nongialam ka NPP bad nalorkata ka dei hadein ba u la lap ba ka dei ka briew kaba ym don ia kata jingsngewthuh jingmut ha ka rukom treikam na bynta ki kam bapher bapher.
Katkum ka jingbatai jong u Bah Plielad Tiewsoh, u la ong ba ha 5 tarik mynta u Bnai, u la ioh ia ka shithi wengkam shipor na u President ka NPP ha Ri Bhoi, uba la wengkam halor ka jingkynnoh ba nga leh ia ki kam leh pyrshah Party, ha kaba na ka liang jong u ruh da ka jingkmen ha ka 7 tarik, u la phah ia ka shithi iehnoh kam.

Shuh shuh, la pynpaw ruh ba ha katei ka jingmih jong u na ka Party NPP, ki la don ruh ki rangbah bad ki longkmie kiba bat kam ha ki Block, ki la shim ia ka rai ban iehnoh na ka jinglong kum u briew na ka Party NPP ha Nongpoh.
Ha katei ka kyrwoh, u Bah Plielad Tiewsoh, u la pynpaw ruh ba ka jingrung jong u sha ka NPP, ka dei lyngba ka jingsngew shngain jong u ia u Dr. D.D Lapang, uba long ruh u Chief Adviser ka NPP bad uba long ruh kum u Chief Adviser jong ha ka sorkar jylla.

Hynrei kawei na ki daw kaba la pynlong ia utei u rangbah, ba un iehnoh ia ka jinglong nongialam ha ka NPP, ka dei namar ba um don ka jingshaniah ban trei bad ka Kong Macdalyne S. Mawlong, ha kaba u la pynpaw ruh ba ha ka jinglap jong u, ba ka kyrtong jong ka NPP na Nongpoh kam pat dei kaba la shemphang ha ka kam nongialam.
U Bah Plielad Tiewsoh, haba pynkut ia ka kyrwoh, u la pynpaw ba ia kaba mynta kin sa pynbeit bad ki paralok, na ka bynta ba kin kyrshan ha kane ka Ilekshon 2023, namar kum u briew uba la sngewtynnad ha ka kam Ilekshon bad ba ym lah hi ruh ban shu shong sngapjar, hynrei ha kane ka kynti kaba mynta kin sa kyrshan ia u ne ka, kiba dei ki trai shnong bashong ba sah ha Nongpoh Constituency.