Ka Kong Banalari, ka la resain na ka UDP

Shillong:Hadien ba la mih ha ki katto katne ki lad pathai khubor ba ka Kong Banalari Khongwar ka dang dei ka dkhot ka UDP, na ka liang U President ka UDP Pynursla Circle, myn hynnin ka sngi u la ai ka jingpynshai ba ka kane ka jingkam ha ki katto katne ki lad pathai khubor ba ka long kaba bakla.

Shuh shuh na ka liang u President ka UDP Pynursla Circle u la ong ba ka Kong Banalari Khongwar, kaba ju bat kum ka President jong ka UDP Pynursla Circle ka la iehnoh (resign) ïa ka kam President naduh u bnai Lber mynta u snem kumjuh ruh kum ka dkhot (primary member) ka Party UDP.

“Hadien ba ka Kong Banalari Khongwar ka la iehnoh ïa ka kam ka seng khnang ban pyntyllun ïa ki kam jong ka party ka UDP Pynursla Circle ka la dep jied ia ki nongkitkam bathymmai bad mynta kitei ki nongkitkam bathymmai Ka UDP Pynursla Circle ki la ïaid shakhmat bad pynkhlain ia ka Party ha ki Unit bad shnong bapher bapher jong ka Pynursla Constituency” ong u President ka UDP Pynursla.

Ha kaba iadei bad u Kyrtong ban ia aireng ha ka Elekshon MLA 2023 U President u la pynshai ba ym pat don ba pan tiket naka party, hynrei ka party kala ïaid shakhmat ban ïit ïa u briew ba biang tam ban long u kyrtong jong ka Party khnang ban poi sha ka thong ka jingjop, pynkut u President ka UDP Pynursla Circle.