Ka kompeni GVK EMRI kam dei ka khun khadduh ka sorkar, ong ka KSU

Shillong: Ka Khasi Students Union (KSU) ka la kynthah jur ia ka jing sngap mynthi ka sorkar bad ka jingsait met jongka ban tuklar ia ka jingiakhih jong ki nongtrei kane ka kompeni.

Haba kren ha ka jingwan jngoh ia kine kiba shah thngan ha phyllaw ka ophis ka GVK EMRI ha Lawmali myn hynnin ka sngi, u President ka KSU u bah Lambokstarwell Marngar u la ong ba kine ki nongtrei ki la pynlong ia ka jingiakhih la iaid 9 sngi bad la dei ban sngewthuh ba kam dei ba ki shu wan bylla hynrei ban shakri ia ki paidbah ruh.

“Ka GVK kam dei ka khun khadduh ka sorkar bad ka dei ban shim ka jingkitkhlieh bad ka sorkar kam lah ban thet kti ba kim dei ki nongtrei namar ba ka dei ka nongaikam, ka dei hok ban tuklar”, la ong u president ka KSU.
   U la ong ba lada ki briew kiba nabar ki wan ban leh ia kano kano ka kam hangne, ym tharai ba kin shu wan shakri ei hynrei ka don eiei ka jingioh.
    “Kumba ka long mynta ka long kumba ialehkai ia ka jingim briew namar ba ka sorkar ka la leh mynthi, ka seng kam lah ban shu peitkai bad kan hap ban tuklar bad lada ka mut ban shu lehkai, ngi ruh ngi nang ban lehkai”, la ong u president ka KSU.
    Ha kajuh ka por, u nongialam ka FKJGP bah Dundee Khongsit u la ong ba ka seng ka pynrem jur ia kane ka jingleh ka sorkar namar ba ka dei ka jingduh ia ki paidbah bad ka sngew synei ia ki nongtrei 108.
      U la ong ba ka Seng ka wan ban iasynran lang bad ka phah ruh ia ka khubor ban shim khia mardor ban wanrah ia ki doktor ki nurse namar ba lada jia eiei, ka seng kan leh da kaba tyngeh.
        “Ka seng ka ai jingmut ai mynsiem ban iakhih ban dawa ia ka hok jongki bad ka jingleh kane ka kompeni kam don eiei ka jingsngew ia ki briew”, u la ong.
       Ha kane ka sngi, ki dkhot ka Meghalaya People Labour Union (MPLU) ruh kila wan jngoh ia kiba shah thngan hapoh ka jingialam u bah Batskhem Basaiawmoit.
       Lah ban kdew ba ki nongtrei ka kompeni GVK EMRI 108 kila sdang ia ka jingiakhih shah thngan la khyndai sngi mynta bad la bun kiba la shah kit noh sha jaka sumar namar ka jingtlot hynrei ka sorkar kam pat leh eiei ne ka kompeni ruh.