Ka Komiti kaba peit ia ka hok ki kynthei ha Ri Bhoi

Nongpoh, 20 Jylliew:
Shi bynta ban tehlakam ia ka jingshah ban bein bad ka jingshah thombor jong ki kynthei ha ka Distrik hi baroh kawei, ka Local Complaints Committee kaba dei ka Committee kaba peit kyrpang ban iada ia ki kynthei na ka jingshah thombor, ka la pynbna paidbah ha kaba iadei bad ka rukom ai jingtip lada don kino kino ki jingshah lehbein ia ki kynthei.
Katei ka Committee ka ieng ruh ia ka nongrim katkum ka Sexual Harassment of Women at Work Place Act, 2013, kata ban iada ia ki kynthei ia ka jingshah thombor ha ki jaka treikam kum ha ki office Sorkar, jaka treikam shimet, ha ki Hospital, ki dukan, jaka ialehkai sports bad ia kito kiba treikam ha iing.
Ki jingiada ba kane ka Committee ka ai kyrpang ia ki kynthei ki long, kum ka jingktahkti khlem akor, ka jingkular iarap kam bad ka jingthmu basniew, ka jingkren khlem akor, ka jingpyni ia ki dur khlem akor bad kano kano ka jingkren ne leh kaba ktah ia ka longrynieng jong ki kynthei.
Haba iadei bad ki jingujor, na ka liang ka Local Complaints Committee, ka kyntu ia kiba ngat ia kiba kum kitei jingjia ba kin phah ia ki jingujor ryngkat ka jingsoi bad ka jingthoh kaba shai sha ka Office jong ka District Social Welfare, Ri Bhoi District, Nongpoh.