Ka khyrdop weighbridge ha Amsarim, dei ka jaka khrong beaiñ, ong ka JSU

Shillong:Ka JSU War Jaintia Circle, ka la ioh ia ka jingud, na ki ba bun na ki nongkhaii maw bad nongniah kali ka Ri War Jaintia, ba ki jingkieng thew kali (Weighbridge) ba la pyntreikam da ka tnad Transport ka Sorkar Meghalaya, ha kaba la kynnoh, ba ki dei tang ki khyrdop shna pisa ki riew heh ka Sorkar ha kaba ki la shim kabu ia ka jingkit palat pud ki trok challan Mawshun bad Boulder sha Ri Bangladesh namar ka Sorkar ka ai lad tang 12ton kawei ka trok.

Ka JSU ka la kynnoh ba kawei pa kawei ka trok, ki hap ban iaid lyngba ka jingkieng thew, ha kaba la buh ryngkat ia ki briew ka Sorkar, kiba la tip kum ki Enforcement Inspector. Ha kaba iadei bad ka Amsarim Weighbridge kaba hap ha ka jingkhmih u Bah Paswet uba dei u Enforcement Inspector ha kane ka weighbridge bad la iathuh ba 1000 tyngka ki trok ki hap ban siew tam, nalor ka 200tyngka ba ki dei ban siew sha Sorkar ryngkat ka slip ban ioh ban iaid beit lyngba kane ka jingkieng. Na kane ka 1000 tyngka 500 tyngka ka dei ka bhah jong ki nongtrei Enforcement ka Amsarim, kiba dawa na ki nongniah trok kawei pa kawei.

Kane ka jingshimkabu ki briew Sorkar ka la pynlong ia kiba bun ki nongkhaii maw ban iapnong ha kaba ka dor u maw kam iahap shuh bad ka bai lutsan ban tih bad khaii ia u. Ka JSU ka pynsngew ba bun ki jinglutsan ki la leit sha ka pla shimet ki riew sorkar ha kaba kaba bun eh ka jingsiew kadei ha ki weighbridge nalor ki jinglut kum ka bai maw, bai umphniang, bai kali, bai driver, bai challan bad kiwei kiwei khamtam namar ka dor die ia u maw sha Bangladesh ka dei kaba rit.

U President ka JSU War Jaintia Circle u samla Eddy Kery Pohtam, u la ong ba ka kam khaii mawshun ha kaba nujor bad ki snem ba la dep kata ha ki snem shuwa ka 2016, shuwa ban mih ki weighbridge (kiba la khein beaiñ ruh ka Sorkar pdeng) bad kiwei pat ki khyrdop khrong pisa ki tnad Sorkar kane ka kam khaii mawshun ka la long kaba wanrah jingmyntoi shibun ia ki ba trei bad im ja na kane. Hynrei mynta pat ka la long kaba eh bha bad mynta hi ka wanrah jingmyntoi sa tang ki heh Sorkar ki ba bam suk ia ka um syep kiba trei shitom ha kane ka kam.