KA KHYNDEW RUD LYNTI

Da u Ex.Rev.K.Langrin, Seiñduli, WKHD.

Paralok ba ju pule ia ki jingthoh jong nga, mynta ka 06.09.2020 kaba dei ka Sunday, nga ai khublei ia phi ha ka kyrteng U Jisu Khrist.

Ki la don ki briew kiba la khang ia nga ban thoh article, tangba ngam pdiang bad ngam patiaw namar kane ka dei ka mon sngewbha jong nga. Naduh ba sdang ka Lockdown nga shait thoh article borabor watla ym man ka sngi. Kane kaba mynta ka dei kaba 81.

Ka khubor ba nga kwah ban pynkynmaw ia phi ha kane ka Sunday ka long shaphang KA KHYNDEW RUD LYNTI, ba la seng nongrim na ka jingkren pharshi U Jisu shaphang u Nongbet, ba phi lah ban pule na Mt.13:4; Mk.4:4; Lk.8:5.

Ka khyndew rud lynti ha kaba sdang kam dei ka khyndew kaba eh. Hynrei ka sa kylla long noh ka khyndew kaba eh na ka daw ba la wan ïuh borabor ki kjat jong ki briew bad mrad. Peit thuh ia ka rud lynti ba ju iaid ki masi, ka khyndew ka long kumno?

Ha kane ka jingkren pharshi u Jisu ka khyndew rud lynti ka thew ia ka dohnud ba la kylla eh jong ki briew, la ki longkpa, ki longkmie, ki samla, ki nongkit kam niam, kiba shitrhem, kiba smat ban leit jingiaseng bad kino kino kiba la ioh ia ka jingiaroh na ki para briew.

Kumba ka khyndew rud lynti ka kylla eh da ka jingwan ïuh borabor da ki kjat jong ki briew bad ki mrad, kumta ruh ka dohnud jong kita ki briew kiba la ioh ia ka jingiaroh bad ka nam babha ka kylla eh dei namar ka jingwan ïuh u Soitan. Lada la ailad shisien ia u Soitan ban jam kjat, khlem pep un wan iuh sa ha ka sien ba ar, balai, basaw… bad borabor. Ym dei tang ba un wan ïuh, hynrei un pynlong ka jaka shongthait man ka teng.

Ki briew kiba don ia ka dohnud kum ka khyndew rud lynti kin kylla long kiba sarong, kiba sngewhok, kiba sngewkhuid, kiba sngewbiang, kiba sngewstad, kiba kren beiñ, kiba isih ia kiwei, ki bym don jingmap, kiba pynhiar kput, kiba sngew ba tang ka niam jong ki kaba hok, kiba leh arsap…Mynshuwa ki long kiba dap da ka jingieit, ki beh brai ia ka hok, kiba burom mar kylliang, hynrei naduh ba iohlad u Soitan ban ïuh kjat ka khyndew babha (dohnud jong ki)ka la kylla eh noh.

Ka khyndew rud lynti ka lah ban dei ka dohnud jong nga ne jong phi ko paralok. Ka lah ban dei ka dohnud ba la kylla eh jong ki pastor, ki tymmenbasan, ki phadar, ki evangelist, ne kino kino kiba ju ioh jingiaroh na ki para briew. Ïa kiba kum kita ki briew kiba la kylla eh ka dohnud kum ka khyndew rud lynti ym don lad shuh ban pynbha. Kum kita ki briew kin leit beit beit sha dujok. Lehnohei ka jinghikai ktien Blei ia kum kita namar u symbai babha um ioh lad ban ngam shapoh. Kiba kum kita ki briew kin ong, “Kat ia nga uba bat ia kane ka shuki jong ka balang phi dang wan batai ma phi? Phi dei uei?” Lehnohei ka jinglong riewniam lada ka dohnud ka long kum ka khyndew rud lynti ka bym lah ban pdiang wat lada don ba kren ia ka jingshisha.