Ka khyndew “Kur Garo” hapoh ka Bri U Hynniew Trep

M.S. Ryngksai, Dawki

Kumba 15 ne 20 snem mynshuwa, ki briew na ka thain war Jaintia kiba leit rep tympew ha ka shnong Diphu (Mikir) bad kiba la shong la sah hangta da ki phew – phew snem ki la shah knieh noh ia ki iing ki sem bad ki bri tympew jong ki ha ki trai shnong kiba dei ki jaidbynriew Mikir bad ki da pynjynjar bad beh syndon ia ki. Kumta kine ki khun u Hynniew-Trep ki la hap ban wanphai noh sha la shnong. Kine kiba la shah beh na Diphu, ki la pyrshang ban wad jaka rep hapoh jylla lajong (hapoh Khasi & Jaintia) hynrei ym don ba sngewsynei ne ai jaka rep ia ki.

Dang ha u snem 2020-21 la iohi ha ki kot khubor ba don ki khun u Hynniew-Trep kiba da ki spah iing kiba la leit sah rep la da ki spah snem hapoh ka jylla Mizoram bad haba la pan pata ne dulir long trai ia ki iing ki sem bad ka rep ka riang jong ki, ki nongsynshar shnong – synshar thaw kumjuh ruh ka sorkar Mizoram ki kyntait wat ban ai pata ne dulir long trai ia kine ki khun u Hynniew-Trep bad ki da ong, “Ki bym dei ki jaid bynriew Mizo kin nym lah ban long trai khyndew hapoh ka jylla Mizoram”.

Kaba lyngngoh pat balei ki jaidbynrew Mizo bad kiwei kiwei ki jaidbynriew bym dei Hynniew-Trep (Khasi-Pnar) da kaba suk ki ioh long trai hapoh ka Bri u Hynniew-Trep. Ki don ruh ki jaidbynriew khyllah kiba da kam ruh ba ki don kata ka khyndew kur jong ki hangne hapoh ka Bri u Hynniew-Trep, kata ki dei ki jaidynriew Garo. Hooid, ngi ia don lang hapoh kajuh ka jylla ne ka state hynrei ngi iapher pat ha ka liang ka jaidbynriew bad naduh hyndai kulong – kumah ngi iadon la ki jong ki jong ki jaka – kata ka Bri u Hynniew-Trep ne ka Ri Lum Khasi-Jaintia bad ka Ri Lum Garo ha kaba ym lah ban iakhleh lang. Ngi don la u pud u sam hapdeng ka Ri Lum Khasi bad Jaintia bad ka Ri Lum Garo haduh mynta mynne ruh kine ki pud sawdong ki dang ieng skhem. Kumno kine ki jaidbynriew Garo ki ioh bsuh khlieh bad ioh buhai shnong hapoh ka Bri u Hynniew-Trep (Khasi & Jaintia)? Dei ba ki la pan bad ioh jingbit na ki Syiem, ki Sordar, ki Doloi bad kiwei kiwei ki nongsynshar Hima Sima ne ki dei kiba shu wan buhai shnong beain khlem da ioh jingbit shuwa na ki nongsynshar Hima Sima Hynniew-Trep.

Ha ka jingshisha, haba ki wan shong wan sah ha ka khyndew ka shyiap jong ki khun u Hynniew-Trep, ki dei ruh ban long tang ki shakri bad ki nongbylla sngi jong ki khun u Hynniew-Trep kin nym lah ban long trai ne kam trai wat shi inshi ka khyndew – kata ruh lada ki wan da ka jingtip bad ka jingkhot jong ki nongsynshar Hima-Sima ka Bri u Hynniew-Trep bad lada dei kiba shu wan buhai shnong beain te la dei ba kin mih noh napoh ka Bri u Hynniew-Trep bad leit phai noh sha la Ri Lum Garo jong ki bad dei ruh ban da shain kuna da kaba heh bha ia ki namar ki la pynduh pyndam bad ki la pynsynlen lut ia ki lum ki wah jong ngi ki khun u Hynniew-Trep da ki spah bad hajar – hajar square kilo meter. Ki Syiem ki Sordar, ki Doloi bad baroh ki nongsynshar Hima-Sima bad ki nongsynshar shnong – synshar thaw jong ngi ki dei ban pyrkhat sani bha bad ki la dei ban khang lad noh shi syndon ia ka jingwan tuid bad wan buhai shnong beain jong kine ki khyllah jait shapoh ka Bri u Hynniew-Trep u Hynniew-Skum namar lada ma ngi ki khun u Hynniew-Trep (Khasi-Pnar) ngin leit sha kiwei pat ki jaka jong kiwei pat ki jaidbynriew – ngin nym ioh shong suk thiah suk bad ngin shah pyndik pynjynjar laiphew rukom bad da lei lei ruh ngim lah ban long trai ia ka iing ka sem bad ka khyndew ka shyiap shabar ka Ri Khasi-Jaintia. Kumta ruh ym dei ban ai lad ia kiwei pat ki jaidbynriew ba kin long trai ne leh katba ki mon hapoh kane ka jaka jong ngi – ka Bri u Hynniew-Trep.
Kumta ma ngi ki khun u Hynniew-Trep ‘To ngin ia kyndit-bynriew noh, ynnai kwah ne lalot spah palat kat haduh ban da die duh ia la ka Ri bad ka jaidbynriew lajong. Ynnai kwah long mraw shuh ha kiwei pat ki jaidbynriew khyllah’.