Ka khusnam Sahitya ha Shillong, ia ki ktien ka 8th Schedule

Shillong, 6 Rymphang:
Ka Sahitya Aka demi kan pynlong ïa ka jingsam khusnam sha ki nongthoh kiba kham khynnah kaba la tip kum ka Yuva Puraskar ha ka 10 tarik u Rymphang, 2015 ha U Soso Tham Auditorium. Ki don baroh 21 ngut ki nongthoh ki ban sa ïoh ïa kane ka khusnam ha katei ka sngi, kane ka dei kawei na ki khusnam kaba ka Sahitya Akademi ka ai sha ki nongthoh, kiwei pat ki khusnam ki dei ka Sahitya Akademi Main Award sha ki nongthoh kiba la rangbah; ka Bhasha Samman; ka Sahitya Akademi Translation Award; ka Bal Sahitya Puraskar bad Fellow of the Akademi sha ki nongthoh kiba la paw bha ha ka kano kano ka ktien.
Ïa kitei ki khusnam la ai tang sha ki ktien kiba la rung ha ka 8th Schedule jong ka Riti Synshar jong ka Ri India. Ka jingwanrah ïa katei ka jingaikhusnam sha Shillong ka long kum shi bynta ban kyrsiew ïa ka jait bynriew Khasi ban ïaleh, ïeng ryntih lang bad mih paidbah ban dawa ïa ka Sorkar India ban ithuh bad pynrung noh ïa ka ktien Khasi ha ka 8th Schedule jong ka Riti Synshar jong ka Ri India.
Ha katei ka sngi ai khusnam yn sa don ruh u Jeet Thayil kum u Kongsan, une u dei u nongthoh uba paw jong ka Ri India bad uba la ïoh bun ki khusnam. Ki nongpynïaid jong ka Sahitya Akademi kin sa don ha Shillong bad kiwei ki nongthoh kiba kham khynnah na ki Jylla kiba pher jong ka Ri India bad kumjuh ruh na kane ka Jylla jong ngi. Kane ka dei ka sngi kaba kyrpang bad ka Sahitya Akademi ka la mynjur ban pynlong ïa ka prokram ha Shillong bad la khot sngewbha ïa baroh ki briew kiba ieit
ïa ka thoh ka pule bad wan ban ïashim bynta ha ki lai sngi kata 10 tarik haduh 12 tarik u Rymphang, 2015 ha State Central Library.