Ka khusnam ba khuid tam ioh ka thanat pulit ha Pasture

Shillong, 2 Jylliew:
Ka thanat Pasture Police Beat House ha Lawmali, Shillong ka la shah jied kum kawei na ki thanat, kaba khuid tam bad kaba don ka jingiadei bad ki paidbah kaba biang tam hangne hapoh ka jylla Meghalaya mynta u snem 2013.
Ia kane ka jingai khusnam la leh da ka Altus Global Alliance bad la pynlong ia ka jingai khusnam ia kane ka Heat House hynne ka sngi Saitjain.
Kum ia kane ka jingai khusnam la sdang naduh u snem 2007 bad mynta u snem hadien ba la bishar bha, la ai sha kane ka Beat House.
U Dr Buruah uba dei u Coordinator Altus Globle Alliance jong ka North East ula sam ia kane ka khusnam sha u Officer in charge (OC) jong ka Beat House u Kamlesh P Singh ha ryngkat ka jingiadon lang u Additional Superintendent of Police(crime) Bah Vivek Syiem nalor kiwei de.
U Bah Syiem ula ong ba ka long ka burom ba ka Altus Globle Alliance kaba dei peit ia ka rukom trei kam jong ki pulit kaba jong baroh ka pyrthei ban pynkyntiew ia ka hok jong ki briew bad ban trei na ka bynta ka jingbha ki paidbah,ka long kaei kaba sngew sarong ba ka Pasture Beat House kan shah jied kum ka thana kaba khuid tam ha ka jylla.
Ka jingjied ia kane ka Beat House kam long ba dei tang kaba khuid tam hynrei ka dei ruh namar ba ka don ka jingiadei bad ki paidbah kaba biang. Ka mut ba ka jingshakri ka long kaba dei ban ai jingiaroh bad pynshlur na ki paidbah.
Ka khusnam kam dei ban pynkhyllew hynrei ka dei ka jingai mynsiem ban pynshlur ia ka tnad pulit ban trei ban tei ia ka jingiadei kaba iajan bad kaba kham bha bad ki paidbah ha man ki jaka jong ka jylla.