Ka KHUDA la ialam ka Congress, hynrei ngi pyrshah ia ka sorkar: Pynshngain

Shillong,
13 Rymphang:
U Chief Executive Member (CEM) uba rim ka KHADC u Bah Pyn shngain N Syiem, u la ong ba wat la ka KHUDA ka dei kaba ialam da ka Congress ha KHADC hynrei kam don jingeh ba kan kren pyrshah ia ka sorkar jylla ba ialam hi da ka Congress.
Haba kren ha kane ka sngi Balang, u Bah Syiem u la ong ba ka long ka jingshisha ba ha ka jylla la ialam da ka Congress bad ka KHUDA ha KHADC ruh la ialam da ka Congress, hynrei ia ki mat kiba dei ia ka iap ka im jong ka jaitbynriew, ym don jingkhang lad ban kren pyrshah.
Dang shen, u Bah Syiem uba dei u nongialam ka KHUDA ha ka KHADC, u la talain ia ka sorkar jylla kaba la bat kai bun snem ia ka Village Administration Bill ka KHADC haduh mynta.
“Ka sorkar jylla kam dei ban bat slem ia ki Bill ba pas da ka Council, ngam iahap ia kane ka jingleh ka sorkar jylla”, la ong u Bah Syiem bad bynrap ba dei na kane ka daw, ba ka KHUDA ka la kren pyrshah ia ka jingpynslem ka sorkar ia ki Bill ka Council.
U la ong ba la kumno kumno, ka sorkar jylla kam dei ban pynslem ban pule ia ki Bill ka Council bad ka dei ka kamram jongka, ban pyndep hapoh ar ne lai bnai. “Haba ka shem ne lap ia kano kano ka jingduna, kam dei ban bat sah ia ki Bill, hynrei ka dei ban pan jingshai wut wut”, u la ong u CEM barim ka Council.
U la ong ba ka Village Administration Bill ruh ka la shu bat kai slem bha da ka sorkar jylla kaba la thaw ha ka por jongu.
Katkum ka jingong u Bah Syiem, ki don bun ki bill kiba sahteng ha ka sorkar jylla, kum ka Land Bill kiba la pas da ka Council. Hynrei u la ong, ki don ruh ki Bill jong ki Hima kiba ka sorkar ka la pdiang hynrei um lah ban kynmaw bha ia ki.