Ka khubor sngewlem, na bynta U Dr John Sailo Ryntathiang

Shillong: Ryngkat bad ki nongshongshnong ka sor Shillong bad ka Jylla, ki dkhot jong ka Shillong Khasi Jaintia Church Leaders Forum (SKJCLF) ki la dap da ka jingshaïong na ka khubor jong ka jingkhlad noh u Dr John Sailo ha ka 15/04/20. Ka long ka jingsngewduh kaba khraw bad ka jingthylli kaba ym lah ban pyndap ha ka jingshakri ia ka koit ka khiah ha kane ka thain. To ka jingieit ka jong U Blei kan kdup ia u Dr Sailo, bad ka jingsuk U Blei kan ker tawiar ia ka mynsiem jong u haba ka don mynta ban shongthait junom ha ka jingpdiang sngewbha jong ka jingkdup U Blei.

Kum u riewstad, ha u Dr Sailo la lap ia ka jinglong briew kum u doktor uba isnei; bad ha ka jingiadei shimet, u long u briew uba jemnud bad ba kloi ban iarap. Sha ka imlang sahlang kaba iar, la iohi ha ka Jylla jong ngi ia ka jingnoh synniang jong u Dr Sailo, ym tang ha ka Bethany Hospital, Shillong hynrei ha ka jingkner ia ki kti jong ka jingiarap jong u ha ka koit ka khiah shabar ki pud jong ka Sor Shillong da kaba seng ia kawei pat ka Hospital ha Nongpoh, Ri-Bhoi District.

Ha ka por jong ka jingpait dohnud bad ka jingsngewsih kaba khraw; ka jingkynjah ryngkat ki jingsngew blaw kum ka iing, ka Forum ka pynpaw ia ki jingsngewlem bad jingsngewsynei ia ka iing baroh kawei, ryngkat ruh ia baroh ar ki Bethany Hospital bad baroh ki ba ieit ba thoin jong u Dr Sailo – uba ngi burom eh.

“Ngin ym ioh lad ban leit sngewsih bad leh burom khatduh ia u, hynrei, hangno hangno ha kaba ngi don, ngin duwai na ka bynta ka longïing u Dr Sailo. Ha kane ka por jong ki jingkhuslai jur, ka jingkynmaw ia u kum u nongsumar bad u nonghikai kan pyntngen bad ai ha ki ia ka jingsuk. To ka jingiaidon ryngkat bad ka jingaiei kaba dap kyrhai jong U Blei kin kyrshan bad pynkhlain ia ki ha kane ka por bad lynter ka jingim jong ki” ong katei ka kyrwoh.