Ka khubor sngewlem, halor ka jingkhlad U bah HS Shylla

Ha i Kong Susana Syiemiong, bad ki khun ki ksiew i Bah HS Shylla, na ka liang Ka Dorbar Federation of Khasi States, kaba kynthup ruh ka Dorbar Ki Khlieh Nongsynshar ka Ri Hynniewtrep, ngi phah ia kane ka khubor sngewlem sha phi i kurim, ki khun ki ba ha iing baroh jong i Bah HS Shylla (bam kwai ha dwar u blei)

Ka long shisha ka jingduh kaba khraw ia ka Ri Khasi baroh kawei, ngi iai kynmaw ia ki kam kiba ngi la ia kynduh bad ia kren mynta da ki phew snem ym lah ban jer lut ia ki kam hangne hynrei sngewdei ban pynpaw ia ka jingsngewkhia jong i na ka bynta ka jingdonkam kyrkieh ia ka jingiada ka jaidbynriew ha kaba ngim lah ban klet ba i la long uwei na ki samla ba hakhmat 42 snem mynshwa kiba la ialeh shitom ban pyniatylli ia ki seng sain pyrthei ban ioh ia ka sorkar lai lama ha ki snem 1978-1979.

I la dei u nongmihkhmat uba kyrpang ia ka jaidbynriew Khasi ha kaba ngi lah ban ong ba i la long u nongmihkhmat u nongialam u nongthaw ain shisha ha KHADC uba la pruid dak ia ki katto katne tylli ki ain Hima /Elaka kumba ki paw mynta hapoh KHADC. Ngim lah ban klet ba i la long u Chief Executive Member, uba nyngkong ha ka history jong ka KHADC ban lum ia ka Dorbar Hima Mylliem hadien 18 snem ha ka 7 tarik Nailur 2018 (mynta dap ar snem thik ba i la lum ia ka Dorbar Hima Mylliem) ha madan polo, kaba i la iawer lang ia baroh ha ryngkat u khun u hajar ban ia mih ryntih bad khamtam ki kyntien jingkren jong i ha katei ka sngi ki long kiban sah kynmaw kum shibynta ban pynneh pynsah bad ban pynjanai ia ka Riti Dustur ka jaidbynriew. Ngim lah ruh ban klet ia ka jingiasyllok ka jingsngewkhia ka jingiarap ka jong i dang shen halor kito kiba sahkut shabar jylla ban iarap ia kiba wanphai biang sha la ka Ri.

I la long u nongmihkhmat u riewkhmat jong ka jaidbynriew uba kyrpang i la dei ruh uba la shah shitom na ka bynta ka jaidbynriew bad i la ioh bat ruh ia ki kyrdan sorkar kiba bun ha kaba i la shim bynta ha kiba bun ki kam bad kaba ngi sngewdei ruh ban pynpaw ha kane ka por ka long ba i Bah HS Shylla i la long uwei u nongialam uba kloi ha kaban btin ia kiba bun ki kynhun trei mon sngewbha hapoh ka jylla Meghalaya baroh kawei.

Ha kum kane ka por sa shisien ngi pynpaw ka jingsngewlem bad ka jingsngewsih ka jong ngi halor ka jingduh jong ngi ia kum une u rangbah uba long ka nuksa babha ia ki longdien.

Bah John F Kharshiing,

Chairman, Ka Dorbar Ki Khlieh Nongsynshar Ka Ri Hynniewtrep,

Adviser & Spokesperson, Federation of Khasi States,

mobile : +91-9436102663