Ka khubor Christian Home Sunday: Ki iing khristan kum ka jingiwbih U Khrist (2Kor 2:15.)

Scholar Lawriniang
Nongthliew Presbyterian Church

Ban ia kren shaphang ka jinglong jingman jong ka iing ka sem kan ym kut lano lano namar ba ka jingiaid lynti jong ka ka long kaba jrong bad ba jlan bha, ka kham jrong bun phew shah ban ia ka karta u briew. Ka karta jong ka kan kut tad ynda jia ba ka pyrthei hi kan kut bad kan wai noh dei hangta hi ka karta jong ka iing ruh ka la kut. Bad lada yn thoh lut ia ka jingiaid lynti jong ka iing ka sem kan long kawei na ki phang kaba jrong bha bad kan bam por da ki bnai ki snem ban thoh lut ia ka, hynrei hangne mynta ngam kwah eh ban ia kren ia kita kiei kiei baroh hynrei kaba nga thmu ban ia kren hi ka long kat kum katei ka phang ba la buh ha neng “Ki iing khristan kum ka jingiwbih U Khrist”.

Liak nga kwah ba ngin ia phai lyngkot eh Ka ei ka ïing? Ban ia kren shaphang ka iing lah ban pynsyriem ia ka kum ka hima barit ha kaba don u kpa ka kmie bad ki khun, lane ban pynsyriem ruh kum ka kynja synjuk ne seng kaba slem tam jong u tnga bad ka tnga lem bad ki khun. Ka iing ka dei ka jaka jong ki arngut ha kawei ka snam ba la pynitynnad da ki ban sa wan nadien bad kita ki dei ki khun. Haba ong ka iing kam thew eh tang ia ki iing kaba heh ne dulan hynrei ka thew beit beit ia u kpa ka kmie bad ki khun wat la ka long ka barit eh ruh haba la don kine lai kata ka la dei ka iing. Namar ka jingheh jingrit kam don jingmut satia lada kine lai kyrdan kim don hapoh jong ka. Lada ia kren shaphang ka iing kam thew eh ba ngi thaw ia ka iing ban lait na u slap u phria ka lyer ka sngi, hynrei ka iing ka don ka jingthew ba jylliew bad ba maian palat liam ban pyrkhat, namar ka don shibun kiei kiei kiba shongdor bad ba shong nia ban ia kren. Ha ka pyrkhat saindur u khasi ka kham ia pher na kiwei ki jaitbynriew, namar u khasi haba u kren ia ka iing um ju klet ban kren lang ia ka sem, kane ka pynpaw haba don ka iing don ruh ka sem. ia ka longiing kaba nyngkong eh ha ka baibl ngin shem ha ka (Gen. 2: 24-25).

Kaei ka iing khristan? Ka iing khristan ka thew beit tang ia kito ki briew kiba la tip ia U Jisu Khrist wat la ki shong ha kano kano ka iing. Ngim lah bam khot iing khristan lada kito ki briew kiba shong ha kato ka iing kim pat ithuh satia ia U Jisu Khrist kum u Nongpynim jong ki. Nuksa: Kum ia ki niam Hindu ki Muslim bad kiwei kiwei ki bym pat ithuh ia u Jisu khrist kum u nongpynim ngim lah ban khot khristan ne iing khristan ia ki. Lah ban pynsyiemdur ia ka iing khristan kum ka skul ha kaba ki kmie ki kpa kum ki nonghikai ba kongsan bad kiba stad kiba ym lah ban buh bujli da mano mano ha ka jaka jong ki, kumba long ha skul ka iing khristan ka dei ban long kham palat. Ki iing khristan ki dei kita ki nongleit kurim ba rieh jong U Khrist ha kane ka pyrthei. Dei lyngba ki iing khristan la pynlong ia ka balang ba paw kaba long ka nongleit kurim ba paw jong u Khrist ha ka pyrthei. Kano kano ka jaka ne shnong kaba ym don Balang ba paw kan ym don ruh ka balang barieh, kaba ym don balang ba rieh kan ym don ruh ka balang ba paw.

Ki iing khristan kiba kumno ki long ka jingiwbih u Khrist?
Ngi im ha ki sngi mynta bunsien ki iing khristan i kumba ki long pynban ka jingiwtung ha khmat u Khrist, namar u soitan u la dep hiar thma lut ia ngi ha baroh ki liang. Ka jingshah hiar thma ha u soitan ka long ka jingiapait ia pra ki iing ki sem ka jingiatyllai ka jingpihuin, ka jingpynsarong ia ka ma lade, ka jingiaknieh spah ka jingiankhwan myntoi shimet, ka jingia kwah bor, ka jingiasngew hok, bad bun kiwei kiwei kiba ngam lah ban jer lut ia ki jingshah hiar thma noh ki iing khristan ha u soitan, bad kine baroh ki kylla long ka jingijli ha khmat u Blei. Kumta ka donkam ia ngi ban pynthymmai da kaba ngin shim bad ban kynmaw dngong ia kine ki bynta ba u Khrist hi u la hikai na ka por sha ka por.

Ki iing khristan kiba don ka jingiwbih u Khrist ki don ruh ia ka jingiaburom markylliang haiing ha sem:-
(a). Ka jingiaburom shitnga: “To ia burom markylliang da ka jingtieng burom ia u Khrist. Ki kynthei ki dei ban burom ia la ki tnga la kum ia u Trai. Kumba ka Balang ka pyndon burom bad pynhapoh ialade ha u Khrist, ki kynthei ruh ki dei ban kohnguh burom ia la ki tnga ha kiei kiei baroh. Ki rangbah ki dei ban ieid ia la ki tnga kumba u Khrist U ieid ia ka Balang bad U la aiti ialade na ka bynta jong ka, ban pynkyntang ia ka” (Eph 5:22)
(b) Ka jingburom hapdeng ka kmie u kpa bad ki khun ki kti: Phi ki khun to kohnguh ia la ki kmie ki kpa ha U Trai namar kane ka long ka ba dei kein. Phi ruh ki kpa to wat pynbitar iaa ki khun. To bsa pjiah ia ki da ka jinghikai bad ka jingsneng u Trai. (Ephesus 6:1) bad dei ban don ruh ka jingiaburom shipara bad ia ki heh ki san.

2. Ka iing ka ba dap da ka jinghikai: ka ktien u Blei ka ong ba Hikai ia u khynnah katba u dang khynnah khnang ba un ym kynriah wat haba u la tymmen. Bunsien don ki kmie ki kpa ki ju pynroh khun than wat haba u leh bakla ruh, kane ka long kaba ma haduh katta katta, ka long kumba kynton rnga rhem ha dpei. Kumta kum ki kmie ki kpa ki donkam ban hikai bad sharai bha ia ki khun ha baroh ki liang. Kaba ar pat nga lap ba ki don ki kmie ki kpa kim nang ban teh lakam ia lade ha ka ktien ka tylliej ki kren klumar kat ba lap tengteng ia dom ia nia shitnga ia kren klumar ha khmat ki khun kane ka long kaba bakla haduh katta kum ka iing khristan kumta ka donkam ia ki kmie ki kpa ban long kiba adkar bad phikir bha.
3. Ka iing ba sngewthuh jingmut: ym don dawai ban sop spain ia ka jingjot ka iing ka sem lait na ka jingia dei jingmut shi tnga. Wat ka baibl ba nga bat ka pynshisha ia kum kata. Lada la iing ka pait ka pra kata ka la don lypa ia ki dak orpait ba u soitan u la ioh jaka ban hiar thma. Kumta ka jingialong kawei ka ioh ia ka bor blei kum ba ong u nongrwai.
4. Ka iing syllok bad duwai: kumba u Joshua u ong Ma nga bad ka iing jong nga ngin sha kri ia u Trai, kumta ka iing jong ngi ka dei ban long. Kam ju long kaba bha ban shu wah tang ia ka frame dur ha kamra (Christ is the head of House) hynrei kaba don kam eh ka long ka jingiasyllok ia tei shi iing shi sem da kaba duwai bad shaniah lut ha u khrist.

Jingpynkut: Ban thoh lut ia ki mat baroh shaphang ki iing khristan ka jingiwbih u Khrist kan btai wat ia ka por jong phi ki ba pule hynrei ngan pynkut ia kane da kaba ong: ban long ki iing ki jingiwbih u Khrist dei ban bat ruh ia ka 10 hukum bad ia ki soh u mynsiem ha ka dohnud jong nga jong phi.
Ka iing kaba kumno phin tei ia nga? (Isaiah 66:1-2)

U Blei un kyrkhu