KA KHRISTMAS KABA KUMNO NGIN RAKHE?

Da u A. JELLINGSTAR LYMBA
Ki spah snem ki la ïaid bun haba ka jingrakhe Khristmas ka la long ha shi tyllup ka pyrthei ha la ki jong ki jong ki jingleh rukom katkum ka niam bad jingngeit. Ka phang jong ka Khristmas ka long ka juh, kata, ka jingrakhe ïa ka jingwan longbriew u Jisu Khrist sha kane ka pyrthei ban pynim bad ban pyllait ia ki briew na ka pop bad ka jingpalat. Kane ka rukom jingrakhe ka ïaid na kawei ka snem sha kawei pat. Katba nang ïaid ka por pat ki don shibun ki jingkylla kiba ki briew ki leh bad ki bud ha ki rukom bapher bad jingwanrah rukom thymmai katkum ka jingsngew jong ki nongrakhe?

Ka phang kaba ngan pashat hangne kam long halor kaei ka Khristmas ne mynno bad kumno la sdang ïa ka, hynrei ngin ïa peit khyndiat shaphang ka jingrakhe Khristmas ha ka ri jongngi. Ka jingrakhe Khristmas ha ri Khasi kam pat da long kaba da slem eh namar ka jingwan ka niam Khristan ruh ka dang long tang kumba 178 snem bad ka jingrakhe ka long hadien ba ka niam Khristan ka la san bad suh thied bha ha ka ri. Dei ki missionary na ri Wales kiba la wanrah ïa ka niam Khristan hangne ha ri Khasi jongngi kumba ngi tip, hynrei ka jingrakhe Khristmas pat ka long kaba ngi bud ïa kaba ka pyrthei niam Khristan ki rakhe.

Ngi long ha ri Khasi katba ka rukom jongngi pat ka long ka jong ki nong sepngi (imat ka bym lah lait?) bad ka long kumta ruh ha ka jingrakhe Khristmas bad ka la long ruh ha kawei pat ka rukom kaba ngi ïohi mynta ki por khamtam lei ha kane ka kylla jong ka phew snem kaba ar jong ka spah snem kaba arphew wei (second decade of the 21st century).

Haba ngi peit ïa ka Shillong, ïa ki nongshong shnong, ïa ki rukom im bad ïa ki jingrakhe bapher bapher ki la long shisha ki rukom jong ki nongsepngi ne pyrthuh nongwei kaba long ka jingskuiñ bad jingkhih mynsiem ïa ki Longmynta bad kaba long pat ka jinglyngngoh bad ka jingbynñiaw jong kiba la san ne tymmen. U la don shisha u laiñ bad jingpynïakhlad hapdeng ki longtymmen longsan bad ki longmynta kaba pynmih ki jingkylli na kum ki longtymmen, tip ka pyrthei kaba kumno sha kan long? ym ithuh shuh. Ki jingkylla ki bun, ki jingktah jong ka kiba khraw bad ki jingmih nangta ruh kaba ym ithuh dien ne khmat. Ka don ka jingpynksan ïa ka liem bad ka lup.

Dei ha kaba kum kine ki jingkylla bad ka jingim thymmai kaba pynlong ïa ki briew ba kim lap shuh ïa ka bynta bad tynrai lajong bad kaba pynduh ïa ka jinglong nylla ba la tynneng rong (wat ha ka jingmane Blei). Ban beiñ ruh ngim sngewdei ban ïaroh pat ka eh haba kiei kiei ki shu sdien bad khih shane shatai. Hato ka dei ka jongngi, hato ka long kaba shongkun shong Blei, ne kaba tang ka rong bad jingleh jymbriew.
Ka Khristmas kaba kumno ngin rakhe ka long ka jingkylli jong ki shimet, ka ïing, ka balang bad ka kynhun niam bapher. Ki nongrwai ki kynud sur, Ngi la leh aiu ha kane ka Khristmas? Ban shem ïa ka jubab ka long kaba jyrwit jyrwat namar haba ngi peit ia ka jinglong jong ka jingrakhe ka la paw ha ki bun rong bad ym ithuh shuh ïa ka jinglong nylla jong kane ka jingrakhe, kaba i tieng bad hateng hateng ka ban jahburom pynban namar ba ka Jingmut bad ka Jingrakhe ia kane ka Aiom Khristmas ka don ka jingïapher kaba khraw. Ym baroh ki liang ba ka long kumta hynrei ngi ïohi hi ïa kiei kiei ki bym da donkam than ba ïa jer ne ïa ñiewtang, hynrei tang ki katto katne ki liang kiba shon jingmut.
Kam da don than eh ka jingïapher ha ki rukom jingrakhe Khristmas ha ki jaka sor ne nongkyndong namar ba la jur than ka tynneng. Map! lada khor than ka kynthoh. Sa shisien, ym baroh kiba long kumta. La ha sor ne nongkyndong ka jingrakhe ka paw rong khleh rong bad don ki khep kiba la hab ban leh nongbishar ne nongpeitngor. Kum ban kren ïa ka jingshisha, ki rong pyrthei ki khring bad ki pynshohbiej ïa ki khmat bad ki jingmut jingpyrkhat.
Kawei ka bynta kaba nga kwah ban kynthah kyntien hangne ka long halor ka jingpynlong mar khaïi ïa ka Jingmut bad Jingrakhe Khristmas (commercialization of Christmas). Ïa ka jingshisha ym lah ban len bad ban lait ba haba la khleh jaitbynriew bad jait jingngeit kiba ïa don bynta lang hangta ka long ka rong khleh ne ka khleh khaw lang. Ki bym dei na ka jingngeit Khristmas, ngi lah ban ong ba kam pher ïa ki ba ki shim ïa ka kabu ban kamai ban kajih. Hynrei wat hapdeng ki Khristan ruh kane ka long ka lad kamai, Ngin bishar hi kano kaba dei bad kano kaba bakla.
Tang shu poi ka Aiom Khristmas, ki jingmut jingpyrkhat bad ki lad ki lynti ki long shaphang jong ka. Ki lad kiba la pynlong jingkhaïi ki long ha ki jingpynriam, ka bam ka dih bad ka riam ka beit. Ngin jer khyndiat; ki kseh Khristmas, ki decoration, ki thawdur (replicas), ki cakes bad kiwei kiwei ki hap ha ka jylli jong kane ka lad khaïi pynpaw jingrakhe (commercialized celebration?). Ngim lah ban ong ba tang namar bym ïaid beit ka shynshar khadar lane ba don ka jingïaleh markynti kan pynpjah ïa ka jingrakhe Khristmas. Namar ngi ïohi ba ki briew ki khuslai bym ïoh leit ïew leit hat n aka bynta ka Khristmas!?. Hynrei kata ka jingmut Khristmas ka shong ha ka mynsiem bad ka dohnud (lada ngin kren ïa ka jingshisha). Kiba kynja pyrthei kim lah pynkhih ïa ka jinglong nongmane ba shisha. Ka ri Khasi jongngi ka dang don ha ka jingshong suk haba nujor bad kiwei pat ki jaka jong ka ri bad pyrthei.
Ka lyer Khristmas ka beh jem bad kyrkhu jai ha ki sawlyer ki nongrakhe Khristmas, katba don ki nongrakhe pat ki khyrwait ki pynkhleh jait ïa ka da ki jingkhawai bad jingle sngewbha pyrthei bad kam long ha ka rukom kaba shongkun. Hato ngi la myllen ne kum ïaid lait na ki rukom kiba dei kum ki riewngeit Khristan? Ha ka jingshisha ka jingrakhe Khristmas jongngi ka dei ban long kaba don jingmut bad kaba ai mynsiem, kaba ïalap U Nongpynim bad kaba ai jingkyrmen sha kiwei pat. Kawei ka rukom ruh ba ngi dei ban leh ha kum kane ka Aiom Khristmas ka long ban kner la ki kti jingsbun bad jingai isnei sha kiwei pat kiba long ka jingkyrkhu ïa kita kiba donkam ka jingiarap (hooid, ym tang ha kane ka aïom, hynrei ha kiwei ki por ruh), bad ruh ka jingrakhe kaba don jingmut bad shong Blei ka ban pynpaw ïa ka dor Khristmas kaba shisha. Ka jingim jonglong Khristan kaba shisha kaba kordor tam ïa baroh.
Kawei na ki nuksa kaba ngi ïohi ïa kum kine ki jingleh sbun bad jingai isnei ka long ka kti Jingsbun ka Ri Khasi Channel kaba la ai ka jingiarap bad jingpyni lynti ia ka rukom im bad ka dor longbriew kaba don jingmut shikatdei. Mynta ki la don shibun kiwei pat ruh (ki bym kwah ban pynpaw pyrthei ïa ki kam ba bha jongki, la ka long shimet shimet ne lyngba ka seng) kiba leh ha ka juh ka rukom. Kata ka long kawei na ki bynta jong ka jingrakhe Khristmas kaba dei ban long, ym ka jingrakhe rong. Kata ka long ruh ban sam lem ïa ka jingkyrkhu.
Ha ka pyrthei thymmai ngi ïohi ba la jan baroh ki ïabeh ïa kiei kiei kiba ïaleh lem ka pyrthei. Ka da don kata ka CHRISTMAS SHOPPING kaba la long ka rukom ba ki dei ban leh kaba la ïaleh lem baroh baroh ha ka juk Longmynta. Shitaiew ne artaiew shwa kane ka sngi rakhe Khristmas, kiei kiei baroh ki i long hui hui hai hai khamtam ha sor. Ki ïew ki khapngiah, ka surok bad ki lynti syngkien ki shlei bad ki tuid da ki kali bad ki nongleit nongwan kiba i kumba baroh baroh ki ïabeh bad kyrkieh ban thied ban ïoh ïa kaba ki kwah, ïoh kloi ïoh noh kiwei. I kumba ki iakwah ïa kajuh kumba iaknieh. Ka lad kamai bad ka kabu ïohnong kaba biang tam ha kum kine ki por ka long ka jong ki dukan die riam bad bam kaba ki briew ki ïaleh ban pynïahap katkum ka aiom jingrakhe ban kham sngew ïahap ne ïadei dur. Hana ka la shong ka pyrkhat ba kaba dei rukom bad kaba ïaleh ne iabud lem (trend). Sa kawei ha kane ka pyrthei ONLINE SHOPPING ruh ka pynkhih bad pynshongshit ïa ki nongthied ne nongwad tiar lyngba ki internet ba tang shu “Click & Buy” la lah ban pynpoi ïa ki tiar ha jingkhang ïing da ki rukom thymmai jong ki credit/debit cards, Net Banking ne kiwei kiwei pat ki rukom.
Haba ngin peit ha kawei pat ka liang ngi ïohi ba ka tyngka ne jingmih kaba ngi la lum baroh shisnem ka shu um noh ha kine ki aïom namar kiba bun hi na ki jingthied kiba kham kyrpang la leh ha kane ka por. La ïoh ïa kaba kwah hynrei duhnong ruh ha kawei ka liang namar ki dor ki mur ha ïew ha hat ki long ar bad lai shah na kaba ki ju die; lane ka ïew ïoh kabu. Kiba ïohnong ki long ki dukan die jaiñ bad ki jingbam. Kham bunsien hi ka spah ka phew ha kum kine ki por ka tuid sha kiba ïoh lad jingkamai kata sha ki bar ri bad bar jylla (drain of wealth). Kiei kiei kiba ki la ïohnong nangne ki kit ïa ka spah ka phew sha la ri. Ngi lah ban ong ba na kum kane ka por ngi pynshna shuki ksiar ïa ki mynder bad ki dkhar, katba ma ngi pat ngi theh lut ha ka dor kaba heh bad tang shu ïadait dor palat lah shah beh pynban na dukan ne shah pynbor ban shim ïoh yn ai noh sha kiwei pat ki nongthied. Kano kano ka dor ba ki dukan dkhar ne ki dukan ki oh dor ym lah ban ïadait dor than. Ka thnem ka ïew ka hat bad ka khapngiah bad thyngngian lut ha baroh ki lad bad ki kyndong jong ka Ïewduh bad Khyndai Lad khamtam.
Bunsien wat la kiba bun ki la ïaleit siew leit thied bad ïoh ia kaba ki kwah, khyndiat eh ban ïohi ba kin don ki ban pashat ne ai lem sha kiwei pat kiba donkam ka jingïarap, kiba duk kiba shem shitom kiba pli ki bym ïoh lad ban thied riam thymmai ban bujli ïa kaba la jot (kaba ki ïoh tengkhat eh). Ha kiba don ba em pat, kum ban shu ong noh, ka riam kaba ki la phong shisien ne arsien eh kim phong shuh, hana kim ïahap ne bym ïahap por shuh (outdated fashion). Kum ban kren pyrshah, kiba kum kita (ym baroh) kim kner pat ki kti jingsbun sha kiba donkam shisha ka jingïarap. Lada baroh baroh ki leh bad ki rakhe ia ka Khristmas da ka jingsbun bad jingai isnei ka jingrakhe bad ka dor jong ka Khristmas kan long kaba da kumwei pat, ym tang ka jingpyndep jingleh rukom.
To ai ba ka Khristmas kan da long kaba dei mynsiem bad don jingmut katkum ka kyrteng ne jingrakhe ïa ka. Ai ruh ba ka jingrakhe Khristmas kan long ka jingkyrkhu ïa baroh ym tang ha kane ka aïom hynrei man ka sngi bad shilynter jingim. Ha la ka bor bad ka sap ne jingmut ba beit ngin rakhe Khristmas da kaba don burom bad kaba pyndonburom ïa U Nongthaw. Kum ka jingpynkynmaw bad ka jingkyntu ïa ki riewngeit Khristan: ngi dei ban puson ïoh ba ka jingrakhe ka long ka jingijli hakhmat U Blei; ïoh ngat ha ka jingsneng bad lanot.
Khublei Khristmas