Ka KHNAM ka ieng halor ka nongrim ban iada ia u pud u sam

Shillong, 27 lyngkot:
Ka KHNAM ka ieng ha ka nongrim ban iada ia u pud u sam, ka khyndew ka shyiap bad ka ri bad ka jaidbynriew ba rit paid,” ong u Bah BL Nongbri (Ba ju khot ieid Bah Ban), Chief Organiser ka KHNAM Mawlai Circle uban long ruh u kyrtong na ka bynta ka elekshom MLA 2018 na ka Mawlai na ka KHNAM .
U Bah Ban haba kren ha ka jingialang ka Mawlai Circle ha ka 24 tarik mynta u bnai ha Mawlai Nongkwar Basic School ha ryngkat ka jingiadon lang ki nongialam ka Central Body kiba kynthup ia u Bah Pyndap Saiborne President, Bah Adelbert Nongrum V.President, Thomas Passah President Youth Wing, Shillong City, Bah Adel Bet Nongrum President Mawlai Circle bad kiwei kiwei.
U Bah Nongbri ula ong ruh ba ka thong kaba hakhmat eh ka jong u kalong ruh ban wanrah ia kata ka economic reform ne ka jingkylla ha kaba iadei bad ka ioh ka kot bad ka roi ka par, khamtam ha ka liang ka rep ka riang bad ban kyntiew ia ki longiing kiba duk ba suk ha kiba bun ki liang.
Kiba bun ki nongialam ka jylla ki don ka spah ka phew, hynrei namar ba ki wan na ki longiing ba bit ba biang kumta haba ki rung sha ka kam politik kim sngewthuh halor ki jingeh jong u duk u suk bad dei na kata ka daw ka synshar ka khadar ka hiar arsut namar kim sngewthuh ia ki jingeh jong ki duk ki suk, ong u Bah Nongbri. Kumba kalong mynta u Bah Nongbri ula ong ba ia kiba bun ki kam la wan knieh bad trei da ki briew kiba na shabar jylla, kumta kum u briew uba sngewthuh bha ia ki jingeh jong kiba duk ba suk u don ia ka jingangnud ban wanrah ia ki lad ioh kam ioh jam hapdeng ki trai ri trai muluk lyngba ki skhim bapher bapher naduh ki nongtrei bylla misteri, nongtrei iing briew, ki nongsait jain nong bad kiwei kiwei pat ki kam bylla. Kum u riew shimet bad u kontraktor u Bah Ban ula ong ruh ba mynta kiba bun ki nongtrei bylla kila ioh ia ka jingmyntoi lyngba ka jingwanrah ia ka skhim ha ka shnong Mawlai lyngba ka Megh Building And other Construction Welfare Boad, Shillong, bad u buh ruh ka jingkyntu ia ki nongbylla ban leit iakynduh ia u commisioner jong ka Labour ba kin ioh jingmyntoi lyngba ki skhim bapher bapher.
Ha kane ka jingialang la ioh ruh ka jingkren na u Bah Pyndap Saiborne President ka KHNAM-CB uba la pynpaw ba ka KHNAM ka dang ieng skhem halor ka nongrim ban dawa pyntreikam ia ka Innew Line Permit (ILP) ha kane ka jylla bad ha kaba iadei bad ka Reservation Policy.Nalor u President la ioh ruh ka jingkren na kiwei kiwei pat ki nongialam jong ka KHNAM ha ryngkat ka jingiadon lang kiwei kiwei pat ki nongialam jong ka KHNAM Mawlai Circle kynthup ia ki nongkitkam bad ki riew paidbah.
Shuh shuh ha kane ka sngi la pynskhem ruh ia ki 15 tylli ki unit jong ka Mawlai Constituency kiba kynthup ia ka Nongkohlew ,Mawtawar, Mawkynroh, Mawroh, Nongpdeng, Nongkwar, Mawiong Umjapung, Mawiong Rim, Nonglum, Motsyiar bad kiwei kiwei.