KA KHMAT : Ki jingmyntoi bad ki lynti ban iada ia ki

Kong Linda Kongwang

Ka khmat kadei ka dkhotmet kaba rit hynrei kaba kongsan tam jong u briew.Ka ai jingshai iaka jingim jong manla uwei pa uwei u briew uba im ha sla pyrthei. Ka ai jingshai jan habaroh ki liang kum ha ka iaid ka ieng, haka pule puthi, ban trei ban ktah bad kiwei kiwei de.

Khlem ki khmat phin ym lah ban pynkhih wat tang iwei I phngit barit khlem ka jingiarap na kiwei. Ka jabieng ka treikam hynrei ban pyniaid iaka kam donkam iaki khmat. Ka dei kaba ai jingmyntoi shibun namar kata phi donkam ban sumar bha iaki khmat jongphi ban lait naka jingshitom khmat ne matlah kloi.
Katkum ka jingshem jong ki riew shemphang bad ki nongwadbniah ki lap ba bun naki briew khamtam mynta ki por ki lehsting hakaba iadei bad ki rukom sumar iaki khmat namar kata ki shahktah bad hap deng iitkhmat noh wat haki rta kiba dangrit.

Hangne ki don katto katne ki jingai jingmut kumno ban iada bad sumar bha iaki khmat ban lait naki jingshitom khmat.

• Kiar na kaba kyrjuid ia ki khmat – Na ki kti jongphi lah ban mih shibun ki jakhlia, ki phngit bad ki khniang jingpang bad kine baroh dakaba suk kilah ban rung man baphi ktah ne kyrjuid iaki khmat jongphi. Namar kata kiar na kaba pyndei kti haki khmat jongphi ban lait naka jingshitom bad jingsat khmat. Lada phi longmlien ban pyndei kti haki khmat jongphi wad iaki lad ki lynti katba lah ban lait nakine ki jingmlien kiba sniew.
• Pynmlien ban sait ne thet kti man ka por: Ban sait kti man la kapor kan iada shibun naki khniang jingpang, ki phngit ne ki jakhlia ban rung haki khmat jongphi. Ka jinglah ban sait iaki kti man kapor ym tang baka iada iaki khmat hynrei ka iada ruh iaki khniang jingpang ban rung sha ka met jongphi.