Ka khlam corona bad ka kuna jong ka GST

Bah Monarch Shabong

Ka khlam corona, ka la pynjot thiaw ia ka ioh ka kot jong kiba bun bah ki ri ka pyrthei bad na kaei kaba ngi iohi ha kine ki sngi, la imat, kumba ka jingkhein ia ka jingdon spah jongngi, katba kum u snem 2020, kan nym iahap dur shuh, hynrei ngi la dei ban pynkylla noh ia ka jing buh dor jongngi bad kata ka long ban hap ban leit phai noh, da ar phew snem eiei shadien, na ka bynta ban pyn iahap bad ka jing long jingman ba shisha ka ioh ka kot ha kine ki sngi.

Ka sorkar India bad ka sorkar Jylla, la iohi, ba ki la sdang ban pyni ia katto katne ki jingiarap bad kita ki long ba lada phi siew T.700 shi taiew ia u nong bylla, lane T.1,000 shi taiew ia u misteri, nangta T.3,000 ia kito kiba sahkut shabar ka Jylla bad nangta sa u khaw 5 kilo shi iing lane T.500 ha account jong kawei ka kynthei ba duk bad kitei baroh ki long tang ki jingtah powder suda lane tang ki kam shi hat suda, hyntei kitei kin nym lah satia ban iarap iano iano ruh. Ka sorkar India, kaba kham donbor ban tuklar ia ka pisa tyngka, ka la dei namarkata ban kynmaw ba ka jing pynduh pisa ha u 2016, ka la ktah jubor ia u paidlang ka Ri India bad haduh mynta ki briew, kim don pisa satia ha met jongki, namar la hikai ruh ba kin thep pisa hapoh Bank; hynrei kitei ki kyndon, ki long ki bym iaid kam satia.

Mynta ka donkam ban pyniaid buk buk ia ka pisa bad kam dei hi ruh lyngba ki Bank, hynrei ka dei ban sam bai nong ia kiba trei ha kti jongki, ban ailad ba kin die ia ki mar ki mata jongki bad ba kin ioh ban ia thied ia ki jingdonkam jongki bad ka jing ia dei bad ki Bank, ka la dei ban sangeh noh shwa ia mynta shipor sha ki nong kyndong, namar ba ki Bank, ki don jngai bah na ki shnong bad ba ki internet kim trei kam satia.

Kaba kongsan, ka long ban sangeh noh ia ka jing pyntrei kam ia ka GST, ia mynta shakhmat bad ka sorkar India, ka dei ban pynphai lut ia baroh ki bhah jong u briew shimet, ba ula siew ia ka GST, ia ka bhah ki sorkar Jylla bad katei kan weng ia ka jing suhsat ha ka kamai kajih nangne shakhmat bad ngi tip shai ba ka sorkar India, kam ioh kamai, tang na kaba thaw ia ka ain GST, hynrei ki don shibun ki khajna, kiba la ju pyniaid baroh shi katta bad kiba u paidbah ruh um sngew jynjar satia kum mynta bad lada ka sorkar, ka lah ban map ia katei ka khajna kaba khor ha kane ka kynti, kumta ngin dang iohi ia ki phew hajar ngut ki nongkhaii, ki ban sei bor bah ban kit lyngkor lem bad kham palat ban ia ka sorkar, ha kaba kum kane ka saw ka sian.