“Ka khet bishar balieh ba khraw!”

AIS Suja

Ka khet bishar balieh bakhraw (Great White Throne Judgement), kane kan jia hadien ki 1000 snem (The Millennium), kane dei ka por jingmihpat kaba AR ka jingmihpat ki Nongpop kiba khlem mihpat ha kata ka jingmihpat kaba Nyngkong. “Kita kiba sah na kita kiba iap kin shym la im pat, tad ynda la pyndep ia kata ka 1000 snem”. Jingpynpaw 20:5. Hadien ka 1000 snem kan long ka jingbishar bakhadduh (The final judgement), kumta la ong ia ka ka khet bishar bakhraw (great) bad balieh (White) namar ka jingbishar bahok bad bishar ha ka hok ha kata ka jingbishar.
U Daniel u ong – “Bun na kita kiba la ioh thiah (ba la iap) ha ka dew met ka khyndew kin kyntait, kiwei sha ka jingim bymjukut, kiwei pat sha ka jinlehrian bymjukut bad jingjah burom bymjukut”. Daniel 12:2. Hadien ka 1000 snem, kan long ka jingmihpat jong ki bymngeit ki bym pdiang ia u Jisu Khrist, bad ki la rem lypa. Ioannis 3:18. Kin ym ioh ia ka jingim bymjukut, ka jingbitar u Blei ka iai sah ha u. Ioannis 3:36
Ha kata ka jingbishar bakhadduh hadien ka 1000 snem, kin ia mihpat kiba iap, kiba rit bakhraw, ba ki da ieng hakhmat kata ka khet bishar Bakhraw Balieh, bad la plie ia ki Ar tylli ki Kitab, la plie ia ka Kitab ka jingim: te la bishar ia kita kiba iap ia kiba la thoh ha kita ki artylli ki Kitab katkum ki jingleh jong ki. Jingpynpaw 20:12.
Ha kata ka por, ka duriaw ka la aiti noh ia ki ba ia kiba don ha ka, ka jingiap bad ka Hades ki la aiti ia kiba iap kiba don ha ki, te la bishar ia uwei pa uwei, katkum ki jingleh jong ki. Ia ka jingiap bad ka Hades ba bret sha ka pung ka ding, kane ka long ka jingiap KABA AR ha kata ka pung ka ding kein”. Jingpynpaw 20:13.
Te hadien kata ka jingmihpat kaba AR bad hadien ka jingbishar ha kata ka khet bishar bakhraw balieh, te jar ia u bym la shem ba la thoh ha kata KA KITAB KA JINGIM, yn bret ia u sha kata ka pung ka ding”. Jingpynpaw 20:15.
Kane ka khet bishar bakhraw balieh yn donkam ia ki briew ki bym shym la mihpat ha ka jingmihpat kaba Nyngkong. Ki dei kiba sah na kita kiba iap ki bym shym la im pat tad ynda la pyndep ia kata ka 1000 snem” Jingpynpaw 20:5. Hynrei kiba suk, bad kiba hok, long kita kiba don bynta ha kata ka Jingmihpat ba Nyngkong, ka mut ha ka por ka jingrongnoh, namar la ong – “Ba ma ngi kiba dang im, ia kiba la pynsah haduh kata ka jingwan u Trai, da lei lei ngin ym ioh leit shuwa ia kita kiba la iohthiah (kiba iap), naba u Trai un wan hiar bad da ka Turoi u Blei: KITA KIBA IAP HA U KHRIST KIN IA MIH PAT SHWA. 1 Thessoloni 4:15-16. Kane ka dei ka jingmihpat kaba Nyngkong.
Dei na kata ka daw ka ong ka ktien u Blei – “Uei uba suk bad uba hok, long uta uba don bynta ha kata ka jingmihpat kaba nyngkong, ba ka jingiap kaba ar (ha dujok) kam don bor shuh, hynrei kin long ki Lyngdoh (Priest) jong u Blei bad u Jisu Khrist – kin ia synshar lem bad u Jisu Khrist 1000 snem”. Jingpynpaw 20:6.
Ka mut ba kiba iap bad ba kin mihpat ha kata ka sngi ka jingwan u Jisu Khrist ha shiteng suin kaba long ka por Jingrongnoh, kan long kata kein ka por jong ka jingmihpat ba nyngkong. Kumta kiba mihpat ha kata ka jingmihpat kaba nyngkong kin ioh bynta bad ia synshar 1000 snem lem bad u Jisu Khrist ha kane ka pyrthei. Bad kan long ka por ka jingwan hiar ka Hima u Blei ha kane ka pyrthei ban synshar 1000 snem bad sha ki bymjukut.
Kumta kiba khlem mihpat ha ka jingmihpat kaba nyngkong, kin hap ban mihpat ha ka jingmihpat kaba AR kata hadien ka 1000 snem. Kane ka jingmihpat kaba AR ka long kaba khlem jingkyrmen shuh, ha kaba kata ka jingiap kaba AR ka ap ia ki ha dujok ding bad ki ksuid, kan long ka jingmihpat kaba khlem burom.
Na kata ka daw, “Uba suk bad ba khuid long uta uba don ka bynta ha ka jingmihpat kaba nyngkong”. Jingpynpaw 20:6. Bad kim donkam shuh ban ieng ha khmat kata ka khet bishar bakhraw balieh (Great White Throne). Hynrei kine ki la long ki lyngdoh jong u Blei ban synshar lem bad u ha kata ka 1000 snem. Jingpynpaw 20:4.
Amen.