Ka article da Purningstar Shabong ha ka 21 tarik July 2020 ha U Rupang ka dei ka jingthoh kaba kynsai bad ba don ia ka nongrim ba ka hima Nongkhlaw ka dei ban ai ka jingiaroh.U nongthoh jong katei ka article u la kyrsiew thiah ia ki khun ki hajar ka hima Nongkhlaw bad ia ki paidbah ka ri Khasi shi tyllup.Baroh shi katta ngi la shah niewbein bad shah niewpoh ha ki buit siantia jong ki dohlieh kiba peit sha ngi da ka jingibein bad niewpoh ia ngi kum ka jaidbynriew kaba dang dum.
La katta spah snem ngi la shah kynoi ha ka jingshahthok bad myllen wat ban ialam bakla ia ka jabieng ki khynnah skul kiba pule ia kato ka khana shaphang U Tirot Sing kumba la kynthoh da I bah P.Shabong.Kumba la kdew da I P.Shabong,ki jingshisha ha ka khana shaphang u Tirot Sing ki long tang kiba iadei bad ki snem ,ki kyrteng briew nangta ki jaka imat , hynrei kiba bun kiwei pat la thoh ha kata ka rukom tang ban ioh rhkie bein bad pynhiar dor ia ka nam ka burom jong u Tirot Sing , syiem hima Nongkhlaw.
Ha ki snem ba dang khynnah,ngam kynmaw bha shuh tip dei ha klas basan ne bahynriew ba ngi pule ha skul sha phang u Tirot Sing Syiem bad la pynngeit ia ngi ba baroh ki jingjia ki long kiba shisha.Sa katno phew snem ngin dang shah thok ha kato ka jingthoh ka ban pynngeit bakla ia ki khynnah skul bad samla pule.Ki dohlieh ki thoh ia kato ka khana kum ka khana rkhie bein ne parody,katba ma ngi pat ngi shim ba ka long ka bashisha ne dei lut.Sngew don bok bad dang sngew eh rngiew ruh na bynta ka hima Nongkhlaw ba dang don ki rangbah khasi kum i P. Shabong kiba kloi ban pynlut sngi pynlut por ban pyrkhat ban puson na bynta ban tih bad khmih bniah ia ki pasoh jong ka jingshisha bad kyndat noh sha lait ia kiba lamler.Ka hima Nongkhlaw ka la dei ban ai khusnam ia i P.Shabong namar ba ym pat ju don nongkren kum ma I.
Ha manla ka snem ba leh burom ia u Tirot Sing Syiem,ki nongkren paidbah ki dei kham bun sien ki riew kup burom ba lah ban ai skim ne jingiarap pisa,ym ki riewkhraw pyrkhat ki ban tei bad pynriew spah ia ka pyrkhat pyrdain ki nongsngap ne ki khun ki hajar ka hima.
Ngi dang long khyllung sah ha kaba iadei bad ka history,sa lano ngin sa rangbah noh? Ka history ba ngi shu pyrthuh na ka parody u dohlieh ka la bam kruin la jhor ia ka jabieng jong ki khun ki hajar ka hima bad wat ia ki riew rangbah khasi kiba la shah kynoi ha ki buit sianti jong ki dohlieh.Lyngba kato ka parody,ki dohlieh ne phareng ki pyn iaryngkat ia ka jabieng jong ki khasi ym shuh tang bad ka jabieng sniang;hynrei bad ka jabieng tham ( ne jabieng broilar mynta watla ym pat don syiar broilar ha kito ki snem ). U nongthoh ia ka parody shaphang u Tirot Sing Syiem u la dei u bashyrkhei bad u la pynbthi ia ka jabieng ki Khasi solansar ha kaba uwei na ki riewkhraw ka ri Khasi u la shah ialam bakla ha kane ka parody bad khlem lah shuh ban set ne buhrieh ia la ka jingsngew u la pynpaw ha ki kot khubor ia ka sur kaba kynthoh pyrshah ia u paiem Tirot Sing Syiem ha kaba u la shah dawa ba dei ban panmap.Para ri sa katno sien ngin dang iai shah jop bad shah rhkie bein? Ban pynsah nam ia u riewkhraw uba la aiti ia la ka jingim na bynta la hima ha ka parody ka long kaba pohdor shaba palat.Lada ia u maieit Hopingstone Lyngdoh ngi pynrem bad dawa panmap ba u kynthoh ia u Paiem Tirot Sing Syiem,aiu pat ngin leh ia ka parody kaba kren bein ym tang ia ia u Paiem Tirot Sing Syiem;hynrei ia ki shipai ki swar bad ki khun ki hajar ka hima baroh.Sngewleh rain ba ka parody shaphang u Tirot Sing Syiem ka pyni bad niewbein ba ki Khasi ki khamrit bad kham poh bad kham tlot bor ban ia ki syiar.Ban pdiang ba ka long ka jingshisha ba u Syiem Sohra u pynrieh ia u David Scott da kaba tap da u thlong ka long kaba sngew thamula shaba palat- wat u syiar ryngkuh ruh um ngiam satia ban tap da u thlong. Lada ia u David Scott lah ban buhrieh hapoh u thlong,ki shipai khasi kim donkam kulai,kim donkam khnam kim donkam ryntieh ban beh ia u David Scott; hynrei tang ka jri siat sim ka la biang ban siat ia u David Scott- u briew aiu uta u David Scott uba dang ngiam hapoh u thlong un neh ban shong kulai naduh Nongkhlaw shaduh Sohra.Haduh katno ki tlot ki rangbah ne shipai Nongkhlaw ba kim lah ban iohkem ia kum uta u briew namar lada pyllait ne phah beh tang da ka miaw ruh kan nym dap satia.U David Scott u briew ba dang lah ban buhrieh hapoh u thlong,kumno u lah ban bat ia u lakam kat ka bor jong u kulai khamtam ha ka por ba mareh. Kumta ngi iohi ba ka parody ka danda ym ia u David Scott,hynrei ia baroh ki shipai ki swar ka hima Nongkhlaw ha kaba la niew ia ki khasi ba ki kham tlot bor ban ia ki syiar la ha ka bor met ne bor pyrkhat kumjuh.Lada u phareng un pule ia kane ka parody,un rhkie bat kpoh un rhkie mih ummat kum u khyllung ne khynnah rit ba peit phlim cartoon; mangi pat ngi sngew khyllew.Sa katno phew snem ngin dang shah ialam bakla bad shah rkhie bein.Hato ngin pynsah nam ia u riewkhraw da ka parody ne bret noh ia ka sha poh kyndong.Lada dei ha kiwei kiwei ki ri,ki la wiang ding bad pynkylla dpei ia kum kine ki jingthoh,mangi pat ngi sngew khain sngew khyllew bad sumar bha khop;ym tang katta pynrung ruh ha ki kot skul ban ialam bakla ia ki khynnah bad samla pule bad la dei hi kein ba ki samla pule ruh kin ngiah kin jlep ban pyntbit ia ka sobjek khasi.
Ka shong sa ha ka hima Nongkhlaw,la kan pynsah nam ia u riewkhraw da ka parody ne thoh thymmai da ka history kaba iadei dur bad ka main ka longrynieng jong u riewkhraw.Ha nga shi met hi nga sngew ba ka hima Nongkhlaw ka la dei ban ai khublei kyrpang ia i Purningstar Shabong.
Ronik T Ryntathiang
Nga kwah ban tip lut ki history shaphang ki syiem nongkhlaw,bad nga kwah thik pa thik ki story,naduh kyndong kynshrot lada long,hakano rukom u David Scott u lait phet na ktie ki syiem,ki story ki bym pat don ha ki kot ruh nga tip ki don,sngewbha seh ai lem ka story Jong ka Jing iaid lynti Jong ka hima nongkhlaw,bad baroh ki hima lada phi lah te,namar nga mut thaw jingrwai