Ka khana hyndai, ba ki Garo, ki la pyrshang ban kiew sha u bnai

Shillong:Katkum ka jingiathuh hyndai, la ïathuh ba ki jaitbynriew Garo ki dei kiba nyngkong duh ban pyrshang kiew sha u bnai.
Ka jingpyrsh ang jong ki, ka long kham ha shwa ban ia ka jingleit kiew jong ka kynhun ba la tip kum ka Apollo Mission.

Ha kaba ki jaitbynriew Garo ki la pyrshang da ka lynti jong ka jingstad bad ka jingshem phang jong ki ban poi sha u bnai.
Kane ka khana ka la sdang na uwei u khynnah rit, u ba la iam bad dawa ba ki kmie ki kpa jong u, ki dei ban wanrah ia u bnai.
Ki kmie ki kpa ki la sdang ban khroh ia la u jong u khun da kaba tyrwa ia bun jait ki tiar bad ki pyntieng ruh ia ki mrad kiba lah ban buh jingma kum u khla, hati bad wat u snaiap ruh.

Hynrei u la dawa jur ba u kpa jong u, u dei ban leit kiew sha sahit bneng ban wanrah ia u ia u bnai, kumta u kpa u la kohnguh ia la u jong u khun ha ryngkat ki paralok, ha kaba u la rai ban kiew sha sahit bneng da kaba pyndonkam da ki jingkieng siej.
Ki paralok ki jong u, ki la ai ia u siej ia u kpa jong u ne u khynnah, uwei hadien uwei ba un bteng bad kiew sha sahit bneng bad ha shwa ba un poi sha sahit bneng u la shem ba u donkam sa tang uwei u siej ban pyndep ia ka jingiaid lynti ka jong u bad hangta, ula hylla ia ki paralok bad pan sa uwei u siej.

Hynrei na ka jing bym ia sngewthuh jingmut ki paralok ki dang mut ba u la poi sha u bnai. Kum ha kane ka por ki paralok ki jong u ki la pom noh ia kine ki jingkieng siej, kaba la pynlong ruh ia u kpa jong une u khynnah ban hap bad iap syndon.
Kane ka jingjia ka la jia ha kawei ka shnong ba la tip kum ka Chotipara ka jaka ba la tip kum ka Jajong Kadoram.
Ka jingleit kiew sha u bnai ka khlem lah ban urlong, tang na ka daw ka jing bym ia sngewthuh jingmut ba khyndiat.

Wat la ka jingmih ka long ha kane ka lynti, hynrei ki paidbah Garo, hi ki sngew sarong, namar ki dei kiba nyngkong duh ban leit pyrshang kiew sha u bnai, kham ha shwa ka ri Amerika bad Russia kiba dei ki ri khlaiñ bor bad stad saian.
Kane ka jingiathuh khana ka paw ba ka jingbymlah ban urlong ka dei tang na ka jingsngewthuh bakla ba khyndiat.