Ka KHADC kam dei ban mynjur lynti Rel, donkam ia ka ILP: HYC

Shillong,30’lyngkot:
Ka jaka rung jaka mih, kan ym lah ban iarap ban khanglad ia ka jingwan tuid kyrthep ki mynder sha kane ka jylla , lait noh sa tang ka aiñ kum ka ILP, ka Work Permit , residential permit bad kiwei pat ki ain ba khlain kum ka ILP, ong u General Secretary ka HYC u bah Robertjune Kharjahrin haba kren sha ki nongthohkhubor mynta ka sngi.
Katei ka jingkren u bah Robert ka dei hadien ka jingwan kynduh ki nongialam ka HYC ia u CEM ka KHADC u bah Pynshngaiñ N Syiem ban dawa ba ka District Council da lei lei ruh kam dei ban ai jingbit ia ki jaka puta ne ka khyndew ka shyiap na ka bynta ban pyniaid lynti rel lyngba ka Ri-Bhoi.
Ka HYC ka la ong ba katba ka sorkar kam pat lah ban wanrah da ka aiñ kaba khlaiñ ban khanglad ia ka jingrung kyrthep ki mynder sha kane ka jylla kam pat dei ban phohsniew ia ki kam pynroi kum ka lynti rel kaba lah ba nbuh jingma pynban ia ka jaitbynriew, “Kam dei ba ngi pyrshah ia ki kam pynroi hynrei ngim ia pein pat ia ka jaitbynriew bad ki kam pynroi” ong u bah Robert.
Utei u nongialam HYC u la ong ba lada ka sorkar kam ioh NOC na ka District Council kan ym lah da lei lei ruh ban shim jaka na ka bynta kitei ki kam pynroi jong ka.
“Ngi donkam ban buh kyndon ia ki bar jylla shuwa ba kin rung ha kane ka jylla bad ia kata lah ban leh tang lyngba ka Inner Line Permit, ngin hap ban pynbor ia ki bar jylla ba ki dei ban aplai ia ka ILP shuwa ba kin thied tiket rel” u la ong.
Ka HYC ka la kyntu ia ki trai jaka , ki nongsynshar shnong ba kim dei ban kyrkieh ia katei ka kam hynrei ki hap ban pyrkhat janai bha haduh ban da ioh ia ki ain iada kiba khlain.