Ka kam Uranium ka la kut, ym donkam ban khyllie biang, ong u bah Shylla

Shillong, 27 Nohprah:
U Chief Executive Member barim ka KHADC u bah H.S Shylla u la ong ba ka kam tih Uranium ha kane ka jylla ka la kut bad ym donkam ban dang iai khyllie shuh ia katei ka mat. U la ong ba ha ka sorkar India ka la kren shai ba ka kam tih Uranium la pynkut ha kane ka Ri ym tang hapoh Meghalaya hynrei ha ka jylla Himachal Pradesh bad Uttarakhand ruh bad ka daw ka jingpynkut ka dei halor ki saw tylli ki daw kiba u la batai ba ia kitei ki daw la thoh ha ka Weekly.Mining.com.
U la pynkynmaw ba ha u snem 2009 ka sorkar jylla ka la ai 422 hectare ka jaka sha ka UCIL ban leh ia ki kam tih Uranium ha Mawthabah ha kane ka jylla hynrei ia katei ka rai u la ong ba la weng noh ha ka 1 tarik u nailar, 2016 ha ka jingialang ka kynhun ki myntri sorkar bad la kren shai ba yn ym lah ban leh eiei ha kaba ia dei bad u Uranium khlem ka jingtip ki paidbah lane khlem ka mon ki paidbah. U bah Shylla u la ong ba na ka liang jong u –u ieng skhem haduh mynta ba um ym shah da lei lei ruh ban tih Uranium.
Hadien ba la dep bam smai ha ka 23 tarik mynta u bnai kum u MDC ba thymmai ka KHADC u bah Shylla u la kren shai ba u la kynran dien na ka mat ba u shim mynshuwa kata ym shuh ban ktah ia ka Uranium ha kane ka jylla khlem ka jingiatiplang bad u paidbah kumhba la rai ka kynhun myntri sorkar ha ka 1 tarik u nailar, 2016.