Ka kam U Rohit Prasad ka la kut, ong ka JAC jong ka NEHU

Shillong: Ka Joint Action Committee ba kynthup ia ka NEHUTA, NEHUNSA bad NEHUSU ka la pynpaw ba ka kam jong u Rohit Prasad uba la shah thung kam ha u Vice Chancellor kum u Tecni cal Officer/Senior Consultant ka la kut hadien ba u khlem wan trei shuh mynta la 15 sngi.

U chairman ka JAC, u Prof. Lakhon Kma u la ong ba ka shong mynta ha u VC, kumno ban pyn bna, namar katkum ki kyndon lada uno uno u la jah na ka kam haduh 15 sngi ka mut ba u la iehnoh ia ka kam bad ka NEHU kam donkam shuh ia u.

Lah ban kdew ba kawei na ki mat ba ka JAC ka la iakhih pyrshah ka long halor ka jingthung kam ia u Rohit Prasad da u Vice Chancellor, u Prof. Prabha Shankar Shukla, ha kaba la kynnoh ba ka jingthung kam ka long kaba la shu leh beaiñ tang da u VC marwei khlem da pynbna ne pyntip paidbah. Halor kane ka jingthung ia u Rohit Prasad ka JAC ka la leit ban sei ruh ia u bad khang tala syndon ia ka kamra treikam u Rohit.