“Ka kam u Bah Sniawbhalang, tip bha u heh ka MPCC”

Shillong, 04 Jylliew:
U heh ka AICC ba peit ia ka Meghalaya u CP Joshi u la ong ba ia ka jingbishar jong ka party ia ka jingshah ujor u Bah Sniawbhalang Dhar uba dei u myntri sorkar bad MLA ka party, ka shong ha u president ka Meghalaya Pradesh Congress Committee (MPCC). Ha ka jingjubab halor ka jingkylli halor kane mynta ka sngi, u Joshi u la sait met ban kren eiei halor kane hynrei u la niat sha ka MPCC.
“Ia kane ka kam jong u Bah Sniawbhalang, la tip bha u President ka MPCC ban jubab”, la ong u Joshi.
U Bah Sniawbhalang u la shah ujor ha ka Jowai Congress Committee kaba kynnoh ba u la thmu ban pyniakhun da u Bah Wailad Shylla uba dei u kynum jongu pyrshah ia u MLA ba mynta ka Congress u Dr Roytre Christopher Laloo. Ha kajuh ka por, u la kynthah ia ka BJP ba ka la pyrshang ban bsuh khlieh ha kane ka dong mihngi na ka bynta ki jingthmu buit poh jongka.
U Joshi u la wan iakynduh ia ki nongialam ka Congress ha kane ka jylla ha kaba u la pynlong ia ka jingiakren iathir halor ka jinglong jingman ka party.
“U la ong ba ka jingialang ka long ban iakren ia ka jinglong jingman ka party bad nga la ioh ia ka jingsngew na u Myntri Rangbah, na ki nongkitkam ka party”, la ong u Joshi.