“Ka kam sia lieh ka la don ha Supreme Court”

Shillong, 20 Naiwieng:
U Principal Secretary ka tnad pule puthi ka jylla u P Srivastava u la ong ba ka mukotduma halor ka jingkynnoh bamsap ka kam thung nonghikai LP Skul sorkar ne ka kam sia lieh ha kane ka jylla ka la don ha ka Kashari Supreme Court ka ri.
Haba iakren mynta ka sngi bad u Principal Secretary u la iathuh ba haduh mynta um pat ioh jingtip bha ka la long kumno namar ba um pat ioh iakren bad u nong iasaid ain ka sorkar jylla u Ranjan Chhatterjee.
“Hooid, ka kam ka la don ha ka Supreme Court, tangba ngim pat ioh jingtip ka la long kumno haduh mynta”, la ong u Principal Secretary.
Katkum ka jingtip, la iathuh ba ka Supreme Court ka la thmu ban pynlong ia ka jingbishar hynnin ka sngi ka 19 tarik Naiwieng hynrei namar ki daw, ka la pynsangeh shwa.Ka mukotduma thungkam nonghikai skul ha kane ka jylla ka la poi sha ka Supreme Court hadien ba ki samla ba la pass ia ka eksamin thungkam ki la ujor halor ka jingkynnoh ba thungkam sop sop ia ki bym dei ha ki LP skul sorkar jylla ha u snem 2009-10.Kham mynshwa, Ki samla shah ktah na ka jingleh thok sia lieh ia ka kam nonghikai ha kane ka jylla, ki la pynher shithi ruh sha ka ophis jong u Myntri Rangbahduh ka ri u Narendra Modi da kaba kyntu ba un tuklar ia kane ka kam namar ki la shah lehbein ha kane ka sorkar jylla. Ka ophis jong u Myntri Rangbahduh ka ri ka la ioh pdiang ia kane ka shithi ha ka 1 tarik Nailur 2015 bad ka la ong ba kan leh ia kaba donkam Ka sorkar jylla ka la pynlong ia ka State Eligibility Test (SET) ha u snem 2006 ia ki kam nonghikai Asst Teacher ha ki skul LP ka sorkar ha ka jylla, bad la pynbna ia ka resol ha u snem 2008 bad la pynlong ia ka jingthungkam ha u snem 2010.
Hynrei ia kane ka jingthungkam la lap ba la leh tuh da ka jingtohkit ka CBI ha u snem 2011 bad hadien kane, ka High Court, Shillong Bench ha katei ka por, ka la bthah ia u Principal Secretary ka tnad pule puthi ban thung ia ka High Level Scrutiny Committee (HLSC) bad kane ka komiti ka la pynduh kam 246 ngut ki nonghikai ba shu thung sia lieh ha u snem 2014 katkum ka jingpaw kyrteng ha ka kaiphod ka CBI. Hynrei kaba sngew phylla ka long ba dang don byllai ki nonghikai ba thung sia lieh kiba dang hikai ha ki skul sorkar haduh kine ki sngi.