Ka kam pyntriem ha Ichamati

Bah RM Shabong

Ka jingjia ha Ichamati, kaba don hajan ka kad khaii ha Majai, jong ka Sohra Civil Sub Division, ka la dei ka jingjia kaba sngew triem her ban pyrkhat bad ka daw, ka long ba ki runar, ki nud ban rah da ki dieng tylli ban beh briew, nangta ba ka don ka jing lun maw bad pynjulor ia ki kali, kiba don ha katei ka por jong ka jingjia ha katei ka shnong.

Ka jingtohkit, kan dang iaid ban lap ia kiba donkti ha ka kam bom briew, ka kam pyniap briew, ka kam pynjot kali; hynrei na kaei kaba paw ha ki video bad ki dur ki dar, la iohi, ba ka jingjia jong katei ka kam pyntriem, kam dei satia kaba ki trai shnong jong katei ka thain, kin khein sting, namar ba katei ka dei ka kam, kaba la da pynkhreh lypa ban thaw jing kulmar bad katei ka paw shai, na ka jing ia mih shnong lem bad ki dieng tylli bad nangta sa ka jing pynjot ia ki kali kiba don ha katei ka jaka ha katei ka por.

Ka don sa kawei ka mat kaba hap ia kren hangne bad kata ka long ba lehse ki pulit, ki iohi kyndit ia ka jingjia lane kim pyrkhat lypa bad lada ka long kumta, ka pyni ba ka jingleit jong ki KSU sha katei ka shnong, kam pyn syier mynsiem ia ki (namar ba lada ki lah i tieng lypa, kumta ki la dei ban pynkhlain bha ia ki pyrton jongki); hynrei haba shu peit, la iohi ba ka don ka jingtlot kaba jur jong ki bor pulit, namar ba kumno ki runar, kin ioh ban bom briew bad ban pynjot ia bun tylli ki kali, lada ki la don kham bun bad ki la pynkhreh lypa ialade.

Nalor ba katei ka jingjia, ka la bam mynsiem briew bad ba ka sorkar Jylla, ka la pynlong da ka jing tohkit lane ka magisterial enquiry, kumta ngim tip, la ka jing tohkit kan iaid beit tang halor katei ka jingkulmar kaba la mih ha katei ka sngi, kaba la pynpoi sha ka jing iap briew lane ioh lehse, kan iaid kham shajngai (wat la kan long hi ruh kaba donkam, lada kin shim kham iar ia katei ka mat) bad lada ka jingtohkit kan iaid kham jngai, khlem pep, kan kynthup halor ka shong ka sah kitei ki bar jylla, ka trei ka ktah bad mynta lei ha kajuh NRC, CAA lane ILP, kumta kan wan ruh sa ka jing jurip ia ki kot ki sla bad ka jing pynshisha, ia ka shong ka sah, ka jing long trai shnong bad hangta ngin sa iohi shai ia ka jingmih jong kitei ki spah ngut ki bar Jylla, kiba la long trai ha katei ka shnong, da ki bun bun pateng bad ki phew phew snem mynta.