Shillong, 12 Naitung:
Haba jubab ia ka jingmih lyngba ka Right To Information (RTI) kaba kam ba ka jingpyn khuid ia ka Wahumkhrah kaba la mang T.1,35,00,000 la dep 100 percent, u CEM ka KHADC u Bah Pyn shngain N Syiem ha kane ka sngi Hatmajai u la ong ba ka bynta ba nyngkong jong ka jingpynkhuid ia ka wah Umnkhrah ka la dep hynrei ka jingpynthymmai ia ka wah kam pat long 100 percent.
Haba kren sha ki nongthoh khubor mynta ka sngi, u Bah Pynshngain u la ong “Ka jingpynlut T. 1,35,00,000 da ka KHADC kam dei tang ban pynkhuid ia ka wah. Ngi la pyndonkam ia ka pisa na ka bynta baa bret niut, khang lad ia ki jaboh, shna nala, thied kali kit nuit ia ka Lapalang bad ka Mawlai.”
U la ong ba ka T. 9. 40 lak la sam sha ki san ngut ki MDC kynthup ka Nongthymmai, Laitum khrah, Jaiaw, Mawkhar bad Mawlai kiba don hajan ka wah Umkhrah.
U la ong ruh ba namar ba u MDC na Jaiaw u Bah Adelbert Nongrum um shym la phah ban leh ia kano kano ka kam, u la duh ban pyntreikam ia kane ka skhim ha ka konstitwensi jongu.
”Nga kwah ban pynshai ba ki briew kim nym snegwthuh bakla ia ka pisaT.1,35,00,000 kam dei tang ban pynkhuid wah Umkhrah hynrei ia kiwei ki kam ruh”, la ong u Bah Pynshngain.
Katkum ka RTI, la pynpaw ba ka pisa ba la sam sha ki 9 ngut ki MDC ka long T. 9. 40 lak hynrei T. 31 lak la ai sha ka Mawlai Nongpdeng. Halor kane, u la ong ba um lah ban kren eiei namar ba ia ka pisa la sam ha ka por ba synshar ka ARPA ha kaba u Bah P. T Sawkmie u dei u EM ba peit ia ka Water Resources.
Lah ban kdew ba katkum ka RTI, ka KHADC ka mang T.1.35 klur na ka bynta ban pynkhuid ia ka Wahumkhrah,na katei T. 1,25,97,557 klur tyngka ka dei kaba la pynlut bad T. 8,02, 443 lak tyngka ka dei kaba dang don ha kti ka KHADC.
Shi bynta na katei ka jingpynlut la pynlut T.9.40 lak tyngka na ka bynta kawei ka konsti twensi kaba don ha khappud ka Wahumkhrah kaba mut sha uwei u MDC. Ki don san tylli ki konstitwensi kiba don ha khappud bad ka Wahum khrah kata ka Mawlai, Mawkhaw-Pynthor umkhrah, ka Laitumkhrah, ka Nongthymmai bad ka Jaiaw.
Ka jingai bynta ia kitei ki konstitwensi kaba mar T.9.40 lak tyngka ka long ba kin pyndonkam ia katei ka skhim katkum ki kyndon (Guidelines) kaba ia dei bad ka jingpynkhuid ia ka Wahumkhrah, hynrei la ioh jingtip pynban ba don ki konstitwensi kiba la iaid lait ia ki kyndon treikam jong katei ka skhim ha kaba u MDC u pynlut pynban ia katei ka lak tyngka na ka bynta ban thied kali kit nongpang, bad don pat kiba pynlut ban thied kali kit ñiut. La ioh jingtip ba ka Laitumkhrah ka dei kawei na ki konstitwensi kaba u MDC u la iaid lait ia ki kyndon jong ka skhim Wahumkhrah ha kaba u MDC jong katei ka konstitwensi u la pynthied da ka kali kit nongpang ha ka konstitwensi jong u.
Lah ban kdew ba na kitei ki san tylli ki konstitwensi la ioh jingtip ba ka Jaiaw ka la shah pynduh bad la ai bhah tang ia ki saw tylli, hynrei haba wad jingtip na u MDC ka Jaiaw u bah Adelbert Nongrum u la iathuh ba kam dei ba ka Jaiaw ka shah pynduh hynrei katei ka T.9.40 ka bhah kyrpang na ka bynta jong u ban pyntreikam hapoh ka konstitwensi ka dang don ha kti ka KHADC haduh mynta.
Haba kylli ia ka jingpynslem jong u ban pyntrei ia katei ka skhim kaba naduh u snem 2012 u bah Adelbert u la ong “Ia nga la bthah beit na District Council ha kato ka por ba nga dei ban pyntreikam beit thik katkum ki Guidelines,ngam kwah ban pyntreikam da kumwei pat, nga dei u briew uba iaid beit da ka lynti, na kata ka daw nga dang ia kren bad ki bor shnong ba ki kam ki ban pyntrei kin dei beit thik kiba ia dei bad ka jingkhuid ka Wahumkhrah” ong u bah Adelbert ha ka jingiakren bad u Rupang.
Shuh shuh u bah Adelbert u la ong ba ka jingai jubab ka KHADC lyngba ka RTI halor ka skhim Wahumkhrah ka dei ka jingthok pyllaiñ pylleiñ ia ki paidbah ban ong ba ka Wahumkhrah ka la khuid 100% katba ki paidbah pat ki sakhi da la ki khmat ba katei ka wah ka dang jaboh haduh mynta. Haba phai sha ka jingpynlut ka KHADC kaba haduh T.1.35 klur tyngka u bah Adelbert u la ong ba ka dei tang ka jingpynsyrwa kai ia ka pisa paidbah bad baroh katei ka jingleh ka dei tang ban pynmyntoi ia ki kontraktor katba ka jingkhuid jingsuba pat kam don eiei.
U Bah Adelbert u la dawa na ka KHADC ba ka dei ban ai ia ka pisa sha ka Jaiaw konstitwensi ryngkat ka sut kaba la kha mynta naduh u snem 2011, lym kumta un sa shong pyrkhat bad ki Dorbar shnong kaei ba un leh nangne shakhmat.
“Nga sngewlyngngoh balei ka KHADC ka la mang pisa da ki klur haba nga kum u MDC ha kato ka por ba nga shong ha liang pyrshah nga tip tang T.50 lak hynrei nga sngewsarong ia ki shnong hapoh ka Jaiaw ki bym shym la treh ia kane ka pisa namar ka long ka jingjah burom lada shim ia ka pisa lada ka kam kam seisoh” u la ong. Utei u MDC ka Jaiaw uba la long teng ruh u CEM u la ong ba um sngew iahap ia ka jingshna ka KHADC ia u Mawnongrim uba la pynlut haduh T.3 lak, ka jingpynlut kai ka pisa haduh T.6 lak kata ka bai sha ha ka por ba pynkhuid tang shisien ki MDC, u la ong ba kum u dkhot ka PDF kaba la ialam hi da u Bah Pynshngain N Syiem kum u CEM un sa pan jingshai balei ka pynlut kai ia ka pisa. U la ong ruh ba lada ka PDF kam ai ia ka jingshai ka KHNAM kam don jingkitkhlieh namar ka jingleit kyrshan iaka PDF na ka bynta ka jingeh jong ka jaidbynriew ym na ka bynta ka jingmyntoi shimet.
Phi don ban ong eiei?