Ka kam MDC, kam dei tang ka rynsan ban long MLA, ong u heh Congress

Shillong:U nongialam ka Congress u bah Manuel Badwar u la ong ba ka long ka jingpynthame kai ia ki paidbah ban shu iakhih ban pyrta tang ha ka por elekshon bad tang shu kut elekshon la shu jah noh.
Haba kren mynta ka sngi, u la ong ba la iohi ba ki MDC ki iakhih bha ha kine ki sngi, tang namar ba la jan ka elekshon naduh ka jingleit khynra trading license, bad kiwei kiwei ki kam.

U bah Manuel u la ong ba ka kam MDC kam dei kaba rit ne ban long tang ka rynsan ban poi sha ka kam MLA, hynrei ka District Council ka dei kaba kongsan bha namar ba la pynkup bor da ka riti synshar ka ri ban pynneh pynsah ia ka rukom synshar khadar u Khasi.
“Kaba nga sngew biria eh ka long ba shi snem shwa ka elekshon, ka khih bha, ki mih kiei kiei ki mat bad tang shu kut ka elekshon la jah noh. Kam dei ban long kumto, namar ba ka District Council ka dei ka atiar kaba la ai bor ka riti synshar ka ri”, u la ong.

U la pynbna ruh ba ula pynkhreh ban iakhun iaka MDC elekshon hadien ba la iasyllok bad ki nongialam ka party. “Nga la iakren ban ailad ia kiwei hynrei baroh khoit kila ong ieng shwa ma phi (ma nga). Nga la rai ban iaid shakhmat. Nga kwah ban pynbna ruh ba ka MDC kam dei kaba rit, ym dei ban khein sting namar ba ka dei beit ka lawei jong ki briew jong ngi hi”, la ong u bah Manuel.

U la ong ba ka donkam ban sngewthuh ba la 51 snem ka District Council ka la nang tlot bad ka jingtlot kam dei na ka riti synshar hynrei ka dei lehse na ki nongmihkhmat. Ka la donkam ban iatainia kaba khlain, ban wanrah ia ka jingkylla. U la ong ba lada peit ia ki mar rep hangne, kiba bun ki shah khein kum ki mar khlaw bad kum kane ka donkam ban iatai ia kane.

U la ong ruh ba ka donkam ka polisi ym shu thung Acting hynrei ban pyntreikam katkum ka ain ym ban leh politik pynban ban jied ne thung ia kiba dei ki briew lajong. Ha ka kam sain pyrthei ym lah ban iahap jingmut baroh, bad kaba donkam ka long ban pyrkhat shwa ia ka jaitbynriew bad ialade hadien hynrei lada wan shwa ka malade hakhmat ban ia ka jaitbynriew, kan wanrah ka jingsniew bad ka jingsngewsih.