Ka kam khalai khwai dohkha, ka la ktah ia kiba duna ka ioh ka kot

Shillong:U MLA ka Voice of the People Party (VPP), u Bah Adelbert Nongrum u buh jingkylli ia ka Sorkar halor ka jingkylli ka jingpynkhalai khwai dohkha ha kylleng ka Jylla, khamtam ba kane ka kam khalai ka la ktah ruh ia ka kamai kajih bad bai bam jong kiba bun ki longïing kiba duna ka ïoh ka kot.

U Bah Adelbert, u pynpaw ia kane ka da kaba wanrah ia ka zero hour notice hapoh ka ïingdorbar mynta ka sngi, ha kaba u la pynpaw ka jingsngew khia ruh hapoh ka ïingdorbar halor ka jingjia ha ka 16 tarik Nailur, ha kaba kawei ka longkmie ka la hap ban kha ia i khunlung hapoh kali kamai bad I la khlad noh tang khyndiat por, bad kane ka jingjia ka la mih tang namar ba ka kali kaba kane ka longkmie ka shong ka la sahkut hapdeng surok haduh 3 kynta namar ka jingdon ka tamasa khalai khwai dohkha bad lucky draw ha kawei ka pung kaba don ha rud surok ha Pamphyrnai.

U MLA ka VPP u la buh jingkylli ia ka Sorkar, ba hato ka tip ne em ia ka jingshah ktah jong kiba bun ki longïing na ka jingshah ban pynlong ia kum kitei ki khalai khwai dohkha kaba hap ban siew da ki hajar tyngka, bad kiei ki sienjam ba ka Sorkar kan shim.
U MLA na ka liang pyrshah u la buh jingkylli ruh ia ka Sorkar, aïu kan leh pyrshah ia u Deputy Commissioner ka West Khasi Hills uba la ai jingbit ban pynlong ia kum kitei ki tamasa khalai hakhmat surok kaba la ktah ia ka ïaid ka ïeng ki paidbah, bad kumjuh ka Sorkar kan leh aïu ia u Superintendent of Police ka West Khasi Hills u bym lah ban pynbiang ia ki lad ban pyllait ia ki jingeh ha katei ka jaka ba dheng kali, khamtam ruh hadien ba la iohi ha ki jingrindur ba uwei u pulit u don bynta ban sam khusnam ruh ha katei ka tamasa.

Namar kane ka jingwanrah ia ka zero hour notice, ka la long kaba kyrkieh bad khlem da iohlad ban pynkhreh ia ka jubab, na ka liang u Symbud Myntri Rangbah ba khmih ia ka kam Pohïing, u Bah Prestone Tynsong u la kular ban wanrah ia ka jubab da ka jingthoh hapoh ka dorbar.