Ka kam khaii tuh sha Bangladesh ka iai bteng wat hapdeng ka jinghiran

Jowai:Ka kam khaii tuh lane smugling hapdeng ki nongkhaii tuh (smuglers) na India ka jylla Meghalaya bad Assam bad kiba na ka ri Bangladesh ka dang iai bteng wat lada ka jylla, ka ri bad ka pyrthei hi ka don hapdeng ka jinghiran khamtam haba la hiar ka ioh ka kot ha kaba wat ki nongbylla ruh kim ioh bylla shuh.

Balei kine ki nongkhaii be-ain ki ioh lad? Mano ba la ailad ia ki? Hato kine ki nongkhaii tuh ki don jingiadei haduh katno bad ki pulit ka jylla khamtam bad ki shipai iada pud (BSF)? 

Ka khubor ka ong ba bun ruh ki heh nongialam sengbhalang ki donkti halor kane ka kam.

“Kane ka kam khaii tuh ka jur bha ha ka jylla jong ngi khamtam ha kaba iadei bad ka jingkhaii ia ki masi. Nalorkata ki don ruh kiba khaii ia ki biri bad wat ia u Kwai ruh na kane ka jylla”, la ong u wei na ki rangbah uba sah khappud u bym shym la kwah ban pynpaw kyrteng satia.

“Kum kane ka jingkhaii be-ain na shilliang sha shilliang u Pud ka wanrah ka jingduh kaba khraw ia ka jylla bad ia ka ri, hynrei ka pynriewspah tang ia ki katto katne kiba donkti”, la bynrap utei u rangbah.

Ka long kaba shisha ba ka jingkhaii tuh ia ki masi, u Kwai bad Biri nalor kwei kiwei ki mar ka jur bha ha kane ka jylla khamtam haba kane ka jylla ka don jrong da bun kilometer ki bynta khappud bad ka Bangladesh.

Kane ka la paw shynna bad la sakhi ruh lyngba ka jingiohkem ki VDP ka Shnong Muktapur ia 5 ngut ki briew kiba thmu ban shallan tuh ia u Kwai sha Bangladesh bad kurup ruh ia kawei ka kali pick up ML04c5805.

Shuh shuh ka JSU War Jaintia Circle ruh ka la iohkem haduh 5 byrni u Kwai Supari (Kwai tyrkhong) na kawei ka Kali ha Umlakroh kaba hap ha Amlarem sub-Division.

Dang ha kine ki khyndiat sngi, ki pulit ka East Jaintia HIlls ki la ioh ia ka ejahar na ki BSF bad ki la ioh ban bat ia kawei ka trok kaba la phet krat na kyrdop peitngor kaba don ha Sunapur (Lumpyrdi), East Jaintia HIlls. Hynrei hadien ba la beh thong la lap ba ka kit haduh 20 tylli ki masi kiba la thmu bad khaii tuh sha Bangladesh.

Kum ban pynkynmaw ba ka sorkar Assam hapoh ka jingialam u Sarbananda Sonowal kum u Chief Minister hadien ka jingshah kem u wei napdeng ki Nongthoh Khubor, u la kular ia ka JFA (Journalist Forum of Assam) ban thung ia ka kynhun ka SIT bad tohkit bad ruh ban aiti ia ka kes sha ka tnad CID. Utei uba la shah kem udei uba la suba donkti ban khaii masi tuh na Assam sha Bangladesh lyngba ki jylla khappud bad ka Bangladesh.