Shillong: U CEM ka KHADC u bah H.S Shylla u la ong ba mynta u dang ap ia ka kaiphod halor ka jingpyndonkam ia ka T.28 klur tyngka ha KHADC kaba la pyniaid da u bah Pynshngaiñ N Syiem CEM barim bad u la kynnoh ba la pyntrei ia ka kam tang kumno ban pynlut noh ia ka pisa. U la ong ba u la ioh jingtip ba ki don ki jingtrei kiba kot haduh T.1 klur tyngka hynrei la pyntrei kam tang ban tap khyndew, “Nga ioh jingtip ba ka kam kaba T.1 klur la shu tap tang da ka khyndew” ong u bah Shylla.
U Bah Shylla u la ong ba ia ka jingpan bhah ba 20 percent da u CEM barim u Bah Pynshngain N Syiem yn pyndam noh shisyndon namar kane ka jingleh ka pynsniew ia baroh ki jingtreikam. U la iathuh ba u la pan ruh ia ka ripod na u Joint Secretary ka Council ban ioh jingtip katno tylli ki kam la pyntrei ha KHADC na ka T. 28 klur, bad u la ong ba mynta u dang ap ia ka kaiphod khnang ban buddien ia kane ka kam.
U Bah Shylla u la iathuh ba naduh ka por u CEM barim, u la dep ong ba kam don jingmut ban pynkylla ia katei ka pisa sha ka jingpyntreikam na ka bynta ka Council, hynrei dei ban sam sha ki MDC na ka bynta ki jingdonkam ki paidbah ha ki constituency, bad u la bynrap ba na ka liang ka EC kan buddien bha ia kane ka rukom pyndonkam la ka long da ka jingmynjur lang jong ka EC barim ne ka dei ka rai marwei jong u CEM barim.
U la ong ba ka jingkam jong u CEM barim u Bah Pynshngaiñ ba ka jingbynta noh ia katei ka pisa sha ki kam ka Council ka dei namar ka jingpynslem jong ki MDC ban ai ia Utilisation Certificates (UC) ka dei ka jingkren ba bakla, namar ki MDC ki la pyntreikam lut ia ka pisa ba ki ioh. Katkum ka jingong u Bah Shylla, u Joint Secretary ka Council u la pynbiang lut ia baroh ki kot ki sla hynrei ki jingkhein (bill) ki la sahkut lut ha ka miej jong u CEM bad u la bynrap ba kane ka dei ka jingpynsuki khnang u Bah Pynshngain.