Ka kam dro dur, ka dei kawei na ki lad ioh kam, ka juk mynta

Jowai, 25 Risaw: 
Ka kam dro dur (Artist) ka dei kawei na ki lad iohkam iohjam ha kane ka juk kaba mynta. Ki nong dro, ki long kiba iar ka jingmut jingpyrkhat bad ki lah ban ring dur ia kano kano kaba ki thmu bad wanrah iaki haka jingdro, la ong u ma Moonlight Pariat, MDC ka liang pyrshah ha Jaiñtia Hills Autonomous District Council (JHADC).
U ma Moonlight Pariat, ula ong ia kane haba kren kum u kongsan haka jingplie paidbah iaka “RIÑDUR: Art Workshop & Exhibition” ne ka jingai jinghikai bad ka jingpyninam ba la ring dur da ki artist kaba pynlong da ka ophis u Deputy Commissioner, West Jaintia Hills District haka jingiatreilang ka Riti Academy of Visual Arts, Shillong bad ka Meghalaya Awareness Society for Communication (MASCOM) ha Thomas Jones Synod College.
Kane ka jingai jinghi kai bad ka jingpyninam kaba la plie mynta ka sngi kan kut lashai ka sngi.
U ma Pariat, ula kyntu iaki khynnah skul bad samla pule kiba wan shah hikai ha katei ka jingdro dur ban buh haka jingmut jingpyrkhat jong ki ia kaei kaba ki ioh jinghikai khnang ba kin lah ban pynpaw sha ka pyrthei ia ka sap ki phong dro dur jong ki. U kongsan ula iaroh ruh iaki nongpyniaid kiba pynlong ia kum kane ka jingaihikai naba ka dei ka sien kaba nyngkong eh ha kane ka thain.
 U Deputy Commissioner, West Jaintia Hills District, bah P.S Dkhar, haba kren kum u symbud kongsan, ula ong ba kane ka thain ka don shibun ki nongdro dur (artist) ba tbit, hynrei kim shym la ioh ka lad ban pynpaw sha ka pyrthei ia ka sap kaba ki don. U DC u kyrmen ba lyngba kane ka jinghikai kan pynmih bun ki nongdro dur ba kynsai ban rah iaka nam ka burom jong ka District bad ka Jylla.
Kiwei kiwei kiba kren ki kynthup ia u bah Rafael Wajri, Chairperson ka Riti Academy of Visual Arts, Shillong, u Manosh Roy, Officer Exhibition ka tnad Arts and Culture jong ka sorkar Assam, u D.R Micheal Buam, General Secretary MASCOM.
Ia ka jingialang la pyniaid da u ma H.H Mohrmen, President ka MASCOM ha ka jingiadonlang u Principal ka Thomas Jones Synod College, u bah R.R Kharkongor, ki nonghikai bad ki khynnah skul bapher bapher bad kiwei kiwei ki riew rangbah ka thain bad kio nongdro ka sor Jowai.