Shillong:Ka komishon jong U Justice T Vaiphei, kaba tohkit, halor ka jingshah siat iap U bah Cherishter field Thangkhiew, ka la shim sakhi, na ki 4ngut ki nongtrei jong ka sorkar jylla, hynriew ngut, kiba la wan ialam na ka liang jong ka iing bad sa arngut na kitei ki dei kiba la buh hi da ka komishon bad ka la leit jngoh ruh ia katei ka iing jong ka jingjia, ha Kynton Massar, ha ka 5tarik Rymphang 2022.
Katei ka kaiphod, kaba la bun da ki jing pynjah dak, ka pyni, ba ka jingleit khynra ia ka iing jong U bah Cherish, ka dei kaba shongnia, namar ba katei ka dei na ki jingtip bapher, ba ki la ioh na ki pulit syntiat, halor ki jingdonkti jongu, ha ki kam pyntriem bapher.
Ka kaiphod, ka ong shuh, ba ki don lai sien ki jing pynbthei bom, hapdeng u snem 2020 bad 2021 bad kitei ki kynthup ia ka jingjia ha Star Cement ha Lumshnong bad sa kawei ka Meghalaya Coke Factory, kaba la jia ha Bther bad la iathuh ba kiba shah kem, ki kam, ba ki leh ia katei ka kam, na ka jingbthah jong u Sanbor Pala bad la iathuh ruh, ba ki don shibun ngut kiba ioh pdiang ia ki shithi dawa pisa ha ka kyrteng jong ka HNLC, ha kaba kitei ki shithi, ki dei kiba la phah na ka whatsapp number jong U Ma Sanbor Pala.
La ong shuh shuh, ba katba ki pulit, ki dang lum jingtip, halor kine ki jingjia bapher, hynrei, ka la don sa kawei ka jingbthei bom ha Laitumkhrah, ha ka 10-8-2021 bad ki lad jingtip, ki iathuh shuh shuh, ba ka dang don ka jingthmu ban pynbthei bom biang ha them metor, ha Secreteriat, Iewduh, nalor kiwei ki jaka ha Shillong. Ym tang katta, la iathuh shuh shuh, ba ka don ka jingthmu ban pynbthei bom ha Khyndailad, ha ka 13tarik Nailar 2022 bad ka dei halor katei ka khubor, ba la rai mar mar ban phah kem ia U bah Cherish.
Namar ba ki kyrteng ki la shah ot lut bad kiba bun ki senten, ki la shah pyndam sia lieh, kumta ka jingthoh kam da shai bha satia, hynrei, la iathuh ba ki sakhi jong ki pulit, ki la leit ha iing U bah Cherish, ha ka por 2.55 baje dang step phyrngab, kaba dei ha ka step jong ka 13tarik Nailar bad ka dei ruh ka por, kaba don ka jinghap slap kaba kham jur bad la iathuh, ba ynda la poi ha khyrdop jong ka iing, ki pulit ki la pyrta ia kiba don ha katei ka iing, ba kin kohnguh ia ka jingbthah jong ki pulit, hynrei ha katei ka por, la don ba leit khynra ia ka mala kaba nyngkong bad ka dei ruh ha katei ka por, ba la plie jubor ia ka jingkhang bad la don ruh ka jingsiat ia uwei u briew, uba dei U bah Cherish bad la iathuh ruh, ba ha ka por 3.05 baje, uba shah siat, u dang im, hynrei, ym shym la pyrkhat ban rah sha hospital, namar ba ym don kali kit nongpang satia.
Ki saw ngut ki sakhi, ki iathuh shuh ba ha ka jingdum jong ka miet, uwei u briew, u leit tur beit beit sha ki pulit bad ka dei ha katei ka por, ba la pyrta ba un sangeh, hynrei, haba ula nang wan tur hajar, kumta u pulit ban iada ia la ka jingim, ula siat shi kuli, na ki bynta ba sharum jong ka met bad ynda haba la pynmeh ia ka ding, la lap ruh ba ka don ka tari, ha katei ka jaka jong ka jingjia.
Katei ka kaiphod,ka ai jingmut, ba ym dei ban leit khynra iing satia, ha ka por mynmiet, khamtam ha ki iing ba ki don ki riew paidbah bad la ai jingmut ruh, ba ha kitei ki jingkhynra, ka donkam ia ki kali kit nongpang, ba kin don lang bad nangta ba ki pulit, ki dei ban don ruh ia ki iit khmat kiba pynthaba, ha ka por mynmiet.
Ka kaiphod, ka pynsngew ruh ba ki pulit kiba don ha ka Tactical Team 1, ki dei ban ap sa ar kynta bad kerkut ia ka iing jong u bah Cherish, hynrei lyngba katei ka jingleh, ka pyni, ba ka dei ka jingthombor bad nion bein da ki bor pulit ban shu pyniap ei, ia u briew bad kaba dei ka kam, kaba dang lah bha ban kiar. Ka jingleit talasi, ia katei ka iing, ka dei kaba don ar tylli ki kynhun, ha kaba ki kynthup ka Tactical Team 1 bad ka Tactical Team II, katba uba siat iap ia Bah Cherish, u dei u witness no 4. U Witness no 4, u iathuh, ba ka jingbthah ia u, ha katei ka miet ha shwa jong ka jingjia, ka long ban kem im ia U Bah Cherish, tangba ki dei ban husiar bha, ioh ki don ki tiar siat lane ki don sa kiwei pat ki dkhot jong ka HNLC, kiba sah lang ha katei ka iing, na ka liang jong utei u sakhi, u iathuh ruh, ba ha katei ka miet, u leit sha katei ka iing, da kaba rah da ka suloi AK 47 bad u iathuh, ba ula tied jingkhang laisien, hynrei, haba ym shym don ba plie, kumta, ula pynpait ia ka jingkhang bad rung shapoh iing bad ha katei ka por, ula wan beit beit uwei u briew, sha ka liang kaba u don bad ha katei ka por, ula pyrta, da kaba ong “Sangeh sangeh”, hynrei, haba ula don ha ka jingjngai kaba tang 2,3 phut bad haba um shym sangeh satia, kumta u witness no 4, ula siat noh ia u, na ki bynta ba shapoh jong ka met jongu.
balei u witness no 4 u ju plie mo ia ka ing jng u lada don ba tied 2 – 3 baje mynstep