Ka kabinet kan pynkiew tulop nonghikai SSA, ong u Dr Laloo

Shillong, 19 Naitung:
U Symbud Myn tri Rangbah ka jylla ba peit ia ka pule puthi u Dr RC Laloo u la ong ba ka rai ban pynkiew tulop ia ki nonghikai skul SSA kan shong ha ka kabinet. Ia kane u Myntri u la pyn sngew ha ki nongkitkam jong ka Meghalaya SSA School Association kiba iakynduh ia u mynta ka sngi ban dawa ba ka sorkar ka la dei ban pynkiew noh ia ka tulop jong ki nong hikai skul SSA.
U Bah Aristotle Rymbai u president jong ka seng, u la ong katkum ka jingong jong u myntri, ka sorkar jylla kan sa pynkiew noh ia kane ka tulop jong kine ki nonghikai SSA bad kan long katkum ka mang tyngka jong ka sorkar pdeng bad kaba sah ia ka sorkar jylla ka long ban wanrah ha ka kabinet ban shim ia ka rai.
Ki nonghikai SSA ha kane ka jylla ki don haduh 12481 ngut bad na kine, ki don 6000 ngut kiba la dep ban shah pyntbit kum ki nonghikai bad ki ba sah mynta ki long sa mar shiteng ban ioh jingpyntbit.
U Bah Rymbai u la ong ba ka sorkar ka dei ban ailad ia kine ba dang sah ba kin leit pyntbit katkum ki kyndon ka sorkar.
Kat kum ki kyndon ka sorkar, kiba hikai ha ki Lower Primary ki dei ban long kiba la pyndep ia ka klas XII bad ban ioh 45 percent shaneng bad ki dei ban pyndep ia ka jingshah hikai pyntbit kyrpang ka Teachers Eligibility Test (TET) katba ia kiba hikai ha ki UP School ki dei ban long kiba la pass ia ka Degree.
Ka seng ka la dawa na ka sorkar ba ka dei ban long T.9200/- naduh T.30,000/- ia ki LP School bad ia ki UP School kan long naduh ka T.9500/- haduh ka T.35000/-.