Ka Jylla Meghalaya ka la don kam ia ka bor ban ong “EM” ia ki ain ka Parliament, kiba ktah ia ka jinglong kyrpang ki Jaidbynriew Trai Ri

Bah Robertjune Kharjahrin,President HYC

1. Ka Jaidbynriew Hynniewtrep bad Garo haduh mynshwa kila long ki Ri laitluid lajong bad ki Nongsynhsar Trai Ri naduh mynshwa ki la shynshar laitluid ia kine ki Ri . Haba ki Phareng ki la synshar ia kine ki lum, ka ain nyngkong eh kaba ki la shna na bynta kine ki lum ka long ka Bengal Eastern Frontier Regulation Act 1873. Kane ka ain ka la iada iaka jinglong kyrpang ki Riewlum namar kam shah ia kiwei ki British India ba kin rung bad sah sha kine ki lum khlem ka jingbit ka sorkar bad kam shah ia ki briew bana bar ba kin thied kyndew ha kine ki jaka.
2. Ka Sorkar Bilat ka pynlong iaka Khasi-Jaintia Hills bad ka Garo Hills kum kita ki Excluded Area bad Partially excluded Area, ka section 52 A(2) jong ka Government of India Act (1919) ka ong ba ka Dorbar Thawain ka Sorkar Pdeng (Central legislature) ne ka Dorbar Thawain ka Jylla (Provincial legislature) kim nymlah ban thaw ain ha ki Excluded area ne partially excluded area hynrei U Governor-in-Council u lah ban shu pynteikam tang ia ki ain ka Jylla haryngkat ka jingpynbeit ne pynkylla katba sngewbit u Governor.
3. Ka Sorkar Bilat ka thawain iaka Government of India Act 1935, Ka Constitution ka India mynta ka syriem bha bad kane ka ain. Ka Chapter V bad ka section 91 bad 92 jong kane ka ain ka kren halor ka jing synshar ia ki Excluded Area bad ki Partially Excluded Area . Ka Section 92(1) ka ong ba tang ki bor synshar (Executive authority) jong ka Jylla kan trei kam ha ki Excluded Area bad ki Partially Excluded Area, Ka Federal Legislature (Ka Dorbar Thawain ka sorkar Pdeng) lane ka Provincial Legislature (Ka Dorbar Thawain ka sorkar Jylla) kin nym lah ban thawain ne pyntreikam ia kita ki ain ha kine ki jaka laitnoh satang lada u Governor da ka jing pynbna da ka hukum u pyntreikam ia kita ki ain. U Governor haba u hukum ban pyntreikam ia kita ki ain u lah ban pynbeit lane pynkylla ia kata kat kum ka jingsngewbit.
4. Hadien ba la pynsnoh ia ka Khasi-Jaintia Hills bad ka Garo Hill sha ka Ri India, la pynhap ia kine ki lum ha Assam bad la synshar ia kine ki jaka lyngba ka article 244(2) ha ryngkat ka Sixth schedule ka Constitution . Ha ka por ba don ha ka Assam dang don tang ka Paragraph 12 bad kane ka Paragraph ka pynksan ia ka Bor Thawain ki Autonomous District Council (ADC) . Ka Paragraph 12 (b) kaba dang don haduh mynta ka ai ia ka bor sha u Governor ka Assam ba un pynsangeh ne pynlait bad pynbeit ia ki jingtreikam ki ain ka Parliament ne ka Dorbar Thawain ka Assam ha ki Tribal Area ka Assam.
5. Hadien ba la ai jylla noh ia ka Khasi-Jaintia Hills bad Garo Hills ia kaba la khot ka Meghalaya la shna ia ka Paragraph 12A ha ka Sixth scheduled ka Constitution bad kane ka paragraph ka don artylli ki bynda ka Para 12 A(a) kaba ong ba lada ki ain ki Autonomous District Council (ADC) ki ia tyngkhuh bad ki ain ka Jylla , ha kita ki bynta ba ia tyngkhuh ka ain ka jylla ka ieng bad ka Para 12 A(b) kaba la ong ba tang u President uba lah ban pynsangeh ne pynlait ne pynbeit ia ki jingtreikam ki ain ka Parliament ha ki Tribal Area ka Meghalaya. Kane ka bynta jong ka Para 12 A(b) kaba lah ban pynsangeh ne pynkylla ne pynbeit ia ki ain ka Parliament ha Assam ka don ha U Governor hynrei ha Meghalaya ka leit noh sha u President.
6. Naduh ba la pynlong iaka Meghalaya kat kum ka jingtip, ka sorkar jylla ka la pynpaw ha bun ki khep ba kim ia mynjur ia bun tylli ki ain ka sorkar kmie, Ka Dorbar Thawain ka jylla ruh ka la rai ar tylli ki rai ban kyrpad na u President ka India ban pynlait noh (exempt) na Meghalaya ia ka jingtreikam ka Conservation of Forest Act, 1980 bad arsien arwat iaka Mine and Minerals (Development and Regulation) Act 1957 hynrei ia kine ki jing kyrpad la kyntait war da u President. Ka la don ka jingbymhun na baroh ki liang iaka jingtreikam ki ain kyndew ki bym iahap bad ka rukom bat kyndew ha ka jylla jong ngi kum ka Registration Act, ka Land Acquisition Act bad ki wei. Ka Rights to free and Compulsory Education Act ruh ka la buh jingeh namar bun ki skul ha ka jylla la pyniaid da ki seng treimon sngewbha kum ki niam, ki shnong bad ki sengbapher.
7. Ha kine kipor ba mynta baroh ngi ia kwah ba ka Citizenship Amendment Bills,2016 kan lait naka jylla bad ka Dong shathie lam mihngi, nalor kata la don saka jingtieng ia ka Uniform Civil Code, iaka Central Anti conversion law, ia ka jingkhang bam doh masi baroh kawei ka India, ka jing phah kren bad pule hindi jubor, naka Indian Forest Amendment Act 2019 bad kiwei. Ka jylla hi ka kwah ban lait na kine namar ngi sngewthuh shai ba kine baroh kin ktah iaka jinglong kyrpang bad ki hok jong ngi kum ki Trai muluk. Ka jing kylli mynta ka Long kumno ngin lait na kine ki jingma kiba ap ia ngi kum ka Jylla bad ka Jaidbynriew? Ka jubab kan long ka Jingpynkylla (Amendment) iaka Paragraph 12A(b) jong ka Sixth schedule ka Constitution. Lada ka bor ka dangsah ha ka kti u President ngin long biang kum iaka MMDR Act bad ka Conservation of Forest Act kaba ngin nym ioh ban pynlait ia lade na kata.

Kumta ban iada iaka jinglong kyrpang ka jaidbynriew, ban iada iaka thymmei , ki riti dustur, ka niam ka rukom, ka kyndew ka shyiap, ki mar poh kyndew, ki khlaw ki btap , ka khaii ka pateng bad naka jingshah tyllep noh ha ki poiwir hala ka jylla ngi la don kam ban dawa noh naka Sorkar India ba kan pynkylla noh iaka Paragraph 12A(b) bad ha ka jaka u “President” ngi la donkam ban buh noh ka ktien “Governor” bad ym tang kata khnang ba kane kan treikam ha baroh ka jylla ngi don kam ban pynhap biang ia ka Normal Shillong ne Municipal sha ka KHADC da kaba pynbeit noh mardoh iaka Paragraph 20 ka sixth schedule. Kane ka jingdawa ka long kaba shong nongrim namar kumba la kdew haneng naduh kipor ka Sorkar Phareng ngi la lait na ki ain ki Dorbar thawain ka Sorkar pdeng bad na ka Dorbar thawain ka jylla bad lada pyntreikam ruh la pynbeit pynwan dur shwa ia ki ba kin iadei bad ngi, Ka Six scheduled ba nyngkong eh (original Sixth schedule) ia kane ka bor ka don hi ha u Governor bad ha Assam haduh mynta ka bor kadang don hi ha u Governor.

Para Ri, ka Sorkar India ka don mynta ha ka lyngti ban pynkylla iaka Sixth schedule kumta kane ka dei ka por ba biang bha ban pynlong ki jingdawa ba ka Jaidbynriew Hynniewtrep bad Garo kan ioh biang ia bor ba laduh jong ka bad mynta ka Meghalaya ka Don Kam Kyrkieh ia ka Bor ban Ong “EM” ia ki ain ka Parliament kiba Ktah iaka Jinglong Kyrpang ki Jaidbynriew Trai Ri da kaba pynkylla noh iaka Paragraph 12A (b) bad ia ka Paragraph 20 ka sixth schedule ka Constitution.