Ka jylla ka la pynkhreh ban pynbiang ia ka National Games, ong u Lat

Shillong: U Lat ka jylla u Tathagata Roy u la ong ba ka jylla ka la pynkhreh shaid shaid na ka bynta ban pynbiang ia ki jingdonkam ban pdiang ia ka lumpung national games kaban long ha u snem 2022.
Ha ka jingkren maitphang ha ka sngi thohdieng, ha ka dorbar mang tyngka ka jylla, u Lat u la ong ba ka sorkar ka la pynkhreh ia ka plan ban pynthikna ba kane ka lumpung bah ka ri, kan long kaba jop.
“La thaw bun ki komiti halor kane bad ia ka drfat master plan ruh la pynkhreh”, u la ong.
U la ong ba ka tnad ialehkai ka jylla, ka pyntreikam ruh bun ki prokram ban kyntiew ia ki jingialehkai kum ka Intensive Sports and Youth Development, Chief Minister’s Career Guidance and Counselling Scheme, ka Chief Minister Youth Development Programme, Youth for Green Campaign, Youth Exchange Programme bad ka Meghalaya Mission Football.
Nalor kine, ka sorkar ka pyntreikam ruh ia ka Khelo India Scheme, kaba bei pisa ka sorkar pdeng. Ka la kyrshan ruh ia ki nongialehkai mareh bad kiwei ban leit iashim bynta shabar jylla bad shabar ri bad ha ka lumpung 1st North East Olympic Games kaba long ha Imphal, Manipur, ka Meghalaya ka la khur takma 38 tylli ha ki 10 tylli ki jait jingialehkai.