Ka jylla ka don ha ka khlam, kyrpad u Bah AL Hek ia ka HNLC ban sangeh shwa ia ki kam pyntriem

Shillong: Ha kaba iadei bad ka jingpynbthei bom jong ka seng kieng atiar kata ka Hynniewtrep National Liberation Council(HNLC), na ka liang jong u Myntri ka Sorkar Jylla ha kajuh ka por u ba dei ruh u MLA jong ka BJP, u Bah AL Hek u la kyntu ia ka seng HNLC ba kan sangeh shwa ia ki kam pyntriem jong ka namar ka jingiakren hapdeng ka Sorkar Jylla bad ka Sorkar Pdeng kam pat sdang satia.

Haba kren sha ki lad pathai khubor, u Bah AL Hek u la ong namar ba ka Ri baroh kawei ka don hapdeng ka jingialeh bad ka khlam Covid-19 kumta ka jingiakren hapdeng ka seng HNLC bad ka sorkar kam pat lah satia ban don kumta u la kyrpad ia katei ka seng ba kan nym leh satia kino kino ki kam pyntriem katba ka jingiakren kam pat sdang. U la ong ruh lada ki kwah ban iakren da kaba suk ki lah ban wan ban iakren namar tang ka jingsuk bad ka jingsngewthuh kaba lah ban wan lam sha ka jingsngewthuh hapdeng ka HNLC bad ka Sorkar.