Ka jylla jongngi kam ju pynjop ia ka BJP

Ka dei kaba shisha, ban iohsngew ba ki elekshon ba mynta ki iapher bad ki elekshon kiba 15 (khad-san) snem mynshuwa, ki rukom kanbas elekshon ki da pher bha ha ki sngi kiba mynta. Ka jylla jong ngi kam ju pynjop ia ka BJP. Baroh ngi ia tip shai kdar ba kine ki arngut ki MLA, ki jop ym namar ba ki don ha ka BJP. Lada ym don ma ki, ka party ka la duh jait.

Tang namar ba ki paidbah kim ai jingkyrshan ba pura ia ka BJP, kam mut ba ka Sorkar Kmie ba la synshar da ka BJP ka lah ban iehnoh ia ka Jylla jong ngi, da kaba pynduh skhim bad ai tang ia ki Jylla ba la lam khmat da ka. Hato ka ju pynduh mo ia ki skhim ba bun jait jong ka Sorkar Pdeng bad ba dei ban pyntrei kam da ki Sorkar Jylla, kum ka Jal Jeevan Mission, kaba iadei bad ka um bam um dih ka bakhuid? Ka BJP kam don MLA na Garo, hynrei ka Sorkar Kmie lyngba ka Ministry jong ka Minority Affairs, ka bei pisa ia ka Purno Sangma Complex, ha kaba 90% (90 na ka 100) la pynlut da ka Sorkar Kmie. Don ruh bun kiwei kiwei ki skhim bapher bapher jong ka Sorkar Pdeng ba dei ban pyntreikam da ka Sorkar Jylla, ha ka Jylla jong ngi. Ym don mano mano ruh, ba lah ban pynkhein ia kiba bun ki artikil ba la thoh shai ha ka Konstitushon ka Ri India.

Ka dei ka kamram jong baroh ki sorkar jylla ha ka Ri, ban sumar ia ki nongshong shnong baroh, khlem da leh shiliang khmat, bad ki paidbah kim dei ban sngewthuh bakla. Ki nia elekshon kiba bang bha ban sngap, don kiba rkhie bad thap kti ba sngew iohnong, don ki bym sngew iahap, ki rkhie sammut, don ruh kiba rkhie bad thap kti paralok hi. Wat sheptieng, namar U Blei Un ym iehnoh ia ngi lano lano ruh. Baroh ngi dei ban hun beit ia kaba U Blei U la buh beit buh ryntih. Ym don da kiwei kiwei ki bor ba lah ban pynkylla. Ha KI KITAB KI SALM 2:1- Balei ba ki jaid bynriew ki iabitar lep, bad ki kynja bynriew ki iapyrkhat ia kaba thala. 2:2 – Ki syiem ka pyrthei ki iaieng, had ki nongsynshar ki iasylla lang, pyrshah ia U Trai, bad pyrshah ia uba la sleh jong u, ki ia ong, 2:3 – To ngin iabthat noh ia ki jingkhum jong ki, bad ngin bred noh na ngi ia ki saikhum jong ki. Baroh u bynriew u don hok ban rkhie.

Ngin ap beit ia ka por, kumba la thoh ha KI KITAB KI SALM 2:4 – Uta uba shong ha ki bneng un rkhie: U Trai Un rkhiebein ia ki. 2:10 – Namarkata te to long kiba stad, ko phi ki syiem: to long ba la hikai, phi ki nongbishar ka pyrthei. 2:11 – To shakri ia U Trai ha ka jingsheptieng, bad to iakmen ha ki jingkhynnuih. 2:12 To doh ia u khun, ioh un bitar, bad ba phi iap duh noh ha ka lynti, naba ka jingbitar jong u kan sa meh kloi. Suk kita baroh kiba shaniah ha U.

Mr D. Pakyntein