Ka juk iakren mon

Bah Monarch Shabong

Ha ki khyndiat sngi ba ladep, ngi iohi, ba u myntri rangbah ba ar, ula sangoh ia kito kiba ju mlien ban kren kai ha ki social media, halor ki ishu bapher, kiba dei halor ka jingtrei kam jong ki heh sorkar, naduh ki minister, ki ophisar bad ki tnat sorkar bapher.

Ngi im ha ka juk social media ha kine ki sngi, bad la iohi, ba ka dei ka juk ia kren mon jong ki briew, ha kaba ha man kawei pa kawei ka jingjia, ki don khyndiat kiba iaroh bad bun bah kiba bein, kiba wohnia bad woh daw bun phew jait. Kam dei tang kata, kito kiba ju pule ia ki khubor online jong U Rupang lane kiba leit ha ka peij facebook jong U Rupang, ki ju lap, ba ki nongpule, kim bang ia ki khubor jong ki heh ki hain, ki heh sorkar, hynrei ki bang ia ki khubor kai, ki khubor shutia, ki khubor biria bad kumta ter ter bad katei ka dei ka jing donkam jong kane ka juk.

Halor ka jing wohdaw woh dong, ka jingkren bein ne lorni, kam dei tang ia ki myntri sorkar, hynrei ha kine ki sngi, ma ngi ki nongthoh khubor lei, ngi shah woh daw man ka sngi bad lada shu sngap ia ki jingkren jong ki nong wohnia, kata la hap sangeh noh ka thoh khubor; hynrei lada phi peit bha pat, phi iohi, ba kitei ki dei ki jingthoh kiba ia thoh biria bad kiba phi dei ban pule tang ban ioh jingmut. Ha kine lei ki sngi, ba ka jia ka khlam corona bad ba u myntri rangbah, u ju iathuh tang ia ki number bad um ju pyni kyrteng, la ju lap ba um dei satia u myntri rangbah, uba shah dumok; hynrei ki nongpule, ki ju kynnoh ba u tieng eit u nongthoh khubor lane ba um pynlut por ban ioh ia ki jingshisha.

Kam lei lei, katba ka jia, namar ba ngi dang shu sdang ban pyndonkam ia ki social media, tang da shi snem tam ne duna eh (ia kiba bun) bad ka ju long ka rukom, ba haba dang shu ioh kali thymmai, shu kum kwah leit shang lapmiet kylleng kylleng bad ngin ia khmih lynti, namarkata ba ha ki khyndiat snem ban sa wan, ngin sa nang ban pyn donkam ia ki social media, kum ki lad ba ai jingmut, ban iatei ia syllok, ban ia kaba lapmiet ban ia lorni briew.

Ia ka biria birai bad ka wohnia wohdaw, ka dei ka bynta, kaba ngin nym lah lait satia, ha kane ka juk social media, hynrei kan jin da la bha, lada ngi kiar, tang ia ki ktien byrngem byrsit, ki ktien kiba kren ia ka kynhun jait bynriew bad ia ka niam ka rukom.