“Ka jingwan Arsien”

AIS Suja

Ka jingwan arsien u Jisu Khrist la kren ha ka Bible kumba 1845 sien. Lada ka don ka jingwan arsien, kata ka don ruh ka jingwan shisien ne ka jingwan kaba nyngkong. To ngin ia peit kaba kum kano kata ka jingwan shisien ne jingwan kaba nyngkong.

Ka jingwan ba nyngkong ka long ha ka doh, la kha ha ka doh (born in flesh). “Kan kha ruh ia u khun: men khot ruh ia ka kyrteng jong u U Jisu: naba yn pynim ia ki briew na ki pop jong ki” Mathaios 1:21. La kha ia u Jisu ha Bethlehem Judia. Mathaios 2:1. Bad u la don ha kane ka pyrthei tang 32 snem ei ei haduh ka sngi ka jingsah narphna ha u lum Golgatha. Mathaios 27:32. Kumta, ka jingwan kaba nyngkong, u la wan ha ka jinglong doh “Uta u ktien te u la kynja doh (the word become the flesh)” Ioanis 1:14.

Dei hadien ka jingsahnarphna bad jingmihpat, u Jisu u la phong ia ka met ym shuh kaba kynja doh hynrei kaba kynja bneng. kumta u la kiew noh sha bneng ha u lyoh “La shim noh ia u (Jisu) shajrong: bad u lyoh u la pdiang noh ia u shajrong ba kin iohi shuh ia u” ki kam ki Apostol 1:9. Dei ha kane ka por ba ki Angel ki ong – “Ko Rangbah Galilaia balei phi khmied sha bneng? une u Jisu ia uba la shim noh shajrong na phi sha bneng, UN WAN HA KAJUH KA RUKOM KUMBA PHI LA IOHI BA U LEIT SHA BNENG” ki kam ki Apostol 1:11.

Kumta ha kata ka jingwan arsien pat jong u Trai Jisu un wan ha u lyoh kumba u la leit noh ha u lyoh. Ka jingwan pat ne ka jingwan asien kan jia. Hynrei kan ym jia lymda la pyndep shwa ia kiei kiei baroh. U Blei u la dep buh ka por, bad kata ka por ka long ha ka bor bad ki kti jong u. Bad lada ngin peit bha na ka Bible ngin shem ba u Jisu un wan shwa kum u nongtuh (like a thief). Un wan ban rong noh ia kito kiba la pynkhreh ia kiba ki jainkup jong ki la sait khuid ha ka snam u khun langbrot jong u Blei (Jisu). Kine kiba shah rongnoh kin iashem ha suin. “Namar kane ngi ong ha phi da ka ktien u Trai, Ba ma ngi kiba dang im ia kiba la pynsah haduh kata ka jingwan u Trai, da lei lei ngin ym ioh leit shwa ia kiba kiba la iohthiah (kiba iap). Naba u Trai hi un wan hiar na bneng da ka jingrisa bad ka ktien sawa u angel rangbah, bad da ka turoi u Blei: bad kiba iap HA U KHRIST kin ia mihpat shwa. Kumta ma ngi kiba dang im ia kiba la pynsah, yn rong noh ia ngi lem bad ki HA KI LYOH ia ka ban iashem ia u Trai ha SUIN BNENG” 1 Thessoloni 4:15-18. Hangne kan don ka jingmihpat kiba iap bad ka jingrong noh. Kane kan jia ha shwa ki 3 snem shiteng ne ki 1260 sngi ne ki 42 bnai. Daniel 9:27.

Kane ka jingiashem ha siun ka long tad ynda u Mrad khlaw ne u soitan un da dep ban synshar ia kane ka p yrthei na Jerusalem 3 snem shiteng ne 42 bnai. Kane kan jia hapoh ka jingpyndait kaba saw (fourth seal). Jingpynpaw 6:7-8.
Hadien ki lai snem shiteng (3 ½ snem) ba u soitan u la dep ban synshar ia kane ka pyrthei, te yn kem bad un khum noh ia u kein, 1000 snem. Namar u Jisu un wan ban hiar sha kane ka pyrthei ban synshar bad bishar 1000 snem hangne ha pyrthei. “Bad u angel u la kem ia uta u Iakjakor, uta u bsein tymmen uba long u ksuid bad u soitan, bad u la khum ia u 1000 snem. Bad la bret ia u sha ka liewlong khlem trai (bottomless pit), bad la set ia ka ….. tad ynda la pyndep ia kata ka 1000 snem. Jingpynpaw 20:1-3.
Na suin bneng, ryngkat ki riewkhuid bad u Jisu, kin wan hiar hangne ha pyrthei ha u lyoh. Hangno u Jisu un hiar? Halor u lum Olive. “Te ha kata ka sngi, ki kjat jong u Jisu kin ieng halor u lum Olive uba ha pyrshah Jerusalem shaphang mihngi bad shaphang sepngi ……. Ha kata ka por ka 1000 snem “U Trai un long u Syiem halor ka khyndew baroh: ha kata ka sngi, u Trai un long uwei bad ka kyrteng jong u kawei” Sekharaiah 14:1-9.

Ha kata ka jingwan pat u Jisu, ka por, jong ki 1000 snem kan long ka por kaba ka pyrthei ka dap da ka jingtip ia u Trai. “Kin ym pynmynsaw lymne pynjot ha u lum bakyntang jong nga baroh: Namar ka pyrthei KAN DAP DA KA JINGTIP IA U TRAI, kumba ki um ki tap ia ka duriaw” Isaiah 11:6-9.
Ka pyrthei mynta ka lah ban kren bein da kaba ong – “Hangno kata ka jingkular ia ka jingwan uta u Jisu? ……. Hynrei to tip ba u Trai u iai shah slem bad phi, um mon iano iano ban jot noh … hynrei ba baroh kin poi sha ka JINGKYLLA KABA MUT” 2 Petros 3:9.
“Ha khmih nga wan kloi: suk uta uba iai sumar ia ki ktien jong ka Jingiathuhlypa kane ka Kitab” Jingpynpaw 22:7.