Shillong:Hadien ba mih ka jingtyrwa ban wanrah ia ka lynti rel ha Rilum Jaintia la sakhi ia ka jingmih ki sengbhalang bapher bapher, kiba la pynpaw ka jingpyrshah kaba jur ia kane ka jingtyrwa da kaba kdew ba kin ym pdiang kat ba ka Jylla kam pat don ia ain ki ban iada ia ka jingwanrung kyrthep ki poiwir.
Halor kane na ka liang u Myntri Rangbah ka jylla u Conrad K Sangma u la ong ba ha ka jingshisha ka jingtyrwa ban wanrah lynti rel kam dei ha Jowai hynrei kan dei ha Khliehriat East Jaintia Hill, hynrei ia kane yn leh da la ioh ka jingmynjur na baroh.
“Ngi thmu ban pynpoi lynti rel ha Khliehriat, East Jaintia, kane ruh ka long kat kum ka jingmynjur lang jong u paidbah, ngi dang jurip mynta bad lada ka don ka jingkyrshan na u paidbah ngin iaid shakhmat namar ia kane yn leh na ka bynta ka jingbha ka roi ka par ki paidbah bad ngi kyrmen bad ki paidbah kin sngewthuh ia kane” u la ong.
U la bynrap “Ka jingpyniasoh na kawei ka Jylla sha kawei ka long kaba donkam, bad ngi burom ruh ia ka jingpynsngew ki katto katne ki sengbhalang ki ba kdew ia ka jingsngewkhia Jong ki, hynrei kaei ba nga kwah kdew ka long ba ka Sorkar pdeng kan ym ap shirta bad ngi la ioh pdiang ia ka shithi ban pynphai noh ia ka pisa kaba la ioh pdiang na ka bynta ka Byrnihat Shillong ha kaba kane ka project hi la pynsangeh noh te kan ym urlong shuh”.
U Myntri Rangbah u la ong shuh shuh ba lada ka don kata ka jingmynjur na East Jaintia Hill, ka Sorkar kan pyniaid shakhmat ia kane ka project sha kane ka thaiñ bad ka sorkar ka dang wad lad ruh ban dang ioh kiwei pat ki jaka ban pyniasoh ia ka lynti rel ha ryngkat ka jingmynjur ki paidbah.
U Myntri Rangbah u la pyntip ba ka pisa kaba ki la pynphai ka kot sha ka T 300 klur na ka bynta ban thied ia ka jaka.
Haba kren bad u Myntri sorkar u bah Paul Lyngdoh u la ong ba na ka liang u Myntri Rangbah u la dep kren shai ba la pynsangeh ia ka Railway Project ha Byrnihat, hadien ba don ka jingpyrshah na ki paidbah.
“Ha kaba ia dei bad ka Jaintia hill kumba la iohi hi ki don kiba kyrshan bad don ki ba pyrshah, ka dei ka kamram jong ka sorkar ba kan sngap ia baroh bad kan sa shim rai.Ka sorkar kan sa shim rai hadien ba ka la dep ban sngap bad bishar katkum ka jingkwah u paidbah” u la ong.
Phi don ban ong eiei?