Ka jingtrei shitom jong ngi, ka la leit lut sha nala: Dr Mukul

Shillong: U nongialam ka liangpyrshah ha iing dorbar u Dr Mukul Sangma myn hynnin ka sngi u la ther tyngeh ia kane ka sorkar Meghalaya Democratic Alliance (MDA) ba kam pat nang ban pyniaid ia ka synshar khadar bad u la ong ba um pat shaniah ia kane ka sorkar da lei lei ruh.

“Ka jingtrei shitom jong ka sorkar barim ban pynpaw ia ka nam ba bha ka jylla, ki la leit lut sha nala ha kane ka sorkar ka bym nang ban pyniaid ia ka jingsynshar’, la ong u Dr Mukul haba kren sha ki lad pathai khubor myn hynnin ka sngi.

U la ong ba ka Congress kam shaniah ia ka jingtohkit Magisterial Enquiry halor ka jingjia ha Ichamati bad ka dawa ba dei ban thung da ka jingtohkit kaba khlain bad kaba laitluid.

“Sngewsih ba ngam lah ban shaniah ia kane ka sorkar bad ngi dawa ba dei ban thung ia ka jingtohkit kaba biang, ym da ka magisterial enquiry”, la ong u Dr Mukul.
Ha kajuh ka por, u la ong ba ka Congress kan rah ha iing dorbar ba dei ban shim da ka rai ne resolution ban pyrshah i aka Citizenship Amendment Act (CAA) 2019.
Haba pynrem jur ia kane ka sorkar namar ka jingthut ka shongsuk shongsain ha ka jylla na ka jingjia ha Ichamati, u Dr Mukul u la ong b aka Congress kum ka liangpyrshah kam lah ban shu sngap.
“Ka jinglong jingman ha ka jylla ka la pynlong ia ki paidbah ban sngew khia halor ka jingjia kaba la mih na ka rukom leh kane ka sorkar, kala wanrah ruh ia ka jingsngew kulmar namar ba ki paidbah kim sngewthuh sngewthaw ia ka rukom pyniaid”, la ong u Dr Mukul.
U la ong ba ha kine ki snem ba la dep, ka sorkar barim ka nang ban pyniaid ia ki kam haba mih kum kane ka jingjia bad namar kane, la tip ia ka nam ba bha ka Meghalaya hynrei ha kine ki ar snem tam, baroh ki jingleh bha ka sorkar, kila leit lut sha nala namar ka jingbymler ka sorkar ban pyniaid.
U la ong ba ka kam jngohkai ha ka jylla ka la ktah, ki jaka sah ki nongjngohkai kila thylli bad ka jinglong jingman kala ktah ia ka kamai kajih ki paidbah.
“Ngi la dep maham ia ka sorkar man ka por ia kano kano ka jingji bad ka jingjia dang shen, kala pyni ba ka la don ka jingbym phikir kane ka sorkar bad mynta kala wanrah ia kane ka jingjia kaba ngi pynrem jur ia ka jingjia ha Ichamati”, u la ong.
U la ther ia ka jingpynsangeh ia ka kor internet kaba la pynduh lad ia ki paidbah ban pyndep ia ki kam ba bun jait.
“Ka jingpynsangeh ia ka internet bad ka jingbym lah ban pynneh ia ka shongsuk kala pynlong ia ki paidbah ban shah ktah jur. Ki briew kim tip katno kynta ka korphiw, katno pynjynsur hynnin ka sngi ruh ki briew kim tip. Ka pynjynsur korphiw 12 baje mynsngi, pynbna pat haduh 1:30pm, kane ka la wanrah ia ka jingeh ia ki paidbah”, la ong u Dr Mukul.
U la buh jingkylli, mano ba rai ban pynjari korphiw bad pynjynsur ia ka korphiw, hato na CMO (Chief Minister Office) ne nangno la pynmih ia kane ka jingkhang. “Hato donkam ban khang ia ka internet, ha ki snem ba synshar ha kaba nga ioh ia ka lad ha ki snem ba la dep, haba mih kum kane ka jingjia, ngim shym la khang ia ka internet”.
U la ong ba haba ka sorkar ka pynjari korphiw, ka dei ban pynthikna ba ki paidbah kin shah ktah eh tang malu mala. “Kane ka sorkar kam don ka aidia (idea) bad ka buit synshar bad kala ktah ia ka burom ka jylla”, u la ther.
U la ong biang, “Ka jingjia ha Ichamati, kumno ka sorkar kam tip, ki leh aiu. Man ka sngi, ka ju don ka jingtip barieh ba ai sha u Myntri Rangbah hynrei kumno ka sorkar ka ioh thiah ba kan mih ka jingiakynad”.
U la ong hato ka ai permishon ia ka seng ban pynlong ia ka jingialang bad lada ai permishon, kumno ka la leh ban pynbiang pahara. Ka sorkar kam lah ban shim sting.
“Ngi kwah ba ka sorkar ka dei ban thung da ka jingtohkit halor ka jingjia ha Ichamati, kaba la ktah ia ka jylla, bad kiba donkti dei ban pynshitom katkum ka ain, khlem da pynshong kynriang ia ka ain. Nga sheptieng ioh ba ka sorkar kan shu pyllait khlem pynshitom ia ki runar bad kan wanrah ka jingshong syier”, u la bynrap.