KA JINGTIM LANE KA JINGKYRKHU NA KA CAB

Editor Badonburom, Kane ka dei ka jingthoh bakhadduh eh jong nga sngewbha pyllait kumba ka long. Khublei shibun ia ki jingiatrei lang jong phi baroh naduh ka snem 1978 haduh munta 2019. Khublei. H.S.Shylla KA JINGTIM LANE KA JINGKYRKHU NA KA CAB

Da ka jingsngewkhia ka bakhraw nga pynmih ia kane ka jingthoh – KA JINGTIM LANE KA JINGKYRKHU NA KA CAB. Ba kan long Ain ka CAB nga la kren da kaba shai kdar ha jingialang kaba la long ha Madan Student ha kaba ki Samla ki la khot ia nga ruh ban kren wat la ka la long pyrshah ia ka jing-thmu jong ki, namar ngam lah ban shu ia jngi lang ha ka juh ka sur haba nga la tip kaei ka ban jia. Mynta, ba ka Lok Sabha, Raja Sabha, kata, ka Parliament baroh kawei ka la dep mynjur, bad shuh shuh ba u President ka Ri India u la soi ia ka CAB, kam dei shuh mynta ka CAB hynrei ka CAA (Citizenship Amend-ment Act), kumta, ka jingiakhih ha surok kam don jingmut shuh, ka la dei sa ka jingiatai ha Supreme Court badonburom.

Kumba, nga la kdew ba ka lynti ka dei beit ban ioh da ka ILP, ym dei tang ba shu kren tang da ka ktien hynrei la thaw ruh da ka Bill KHAD (As Adapted from the Bengal Eastern Frontier Regulation, 1873) Regulation, 2018. Kane ka Bengal Eastern Frontier Regulation, 1873 kam don ha kano kano ruh ka Paragraph jong ka Sixth Schedule jong ka Constitution ka India, hynrei da ka bor ba la pynkup ia u Governor mynba ym pat shim la don uwei ruh u MDC ha ka snem 1952, kata, katkum ka Paragraph 19 (1) (b) bad (3) jong ka Sixth Schedule, u Governor Jairamdas Doulatram ha ka 22 tarik April, 1952 u la thaw ia kane ka Regulation – THE UNITED KHASI-JAINTIA HILLS DISTRICT (APPLICATION OF LAWS) REGULATION, 1952 – bad phah sha u President ka Ri India, u (L) Rajendra Prasad, kata, katkum ka kyndon jong ka sub-paragraph (3) jong ka Paragraph 19, ba dei ban ioh ia ka jingmynjur (approval) jong u President ka Ri India; bad tang ha ka 3 tarik May, 1952, u President u la ai ia ka jingmynjur jong u, bad kumta ka la long ka Ain kaba khlain hapoh ka Sixth Schedule.

Ha kane ka Ain kaba u Governor u thaw, kam don kawei ruh ka Ain thymmai, namar ka dei ka jingjied jong u Governor ia ki 225 tylli ki Ain na pdeng ki ain kiba bun bah kiba la don ha Ri India ba kin (225 tylli) long ki Ain kiba yn lah ban pyntreikam ha ki jaka baroh jong ka United Khasi-Jaintia Hills District. Kito ki bym tip ia kane ka Ain (THE UNITED KHASI-JAINTIA HILLS DISTRICT (APPLICATION OF LAWS) REGULATION, 1952) ki sngewthamula haba ki iohsngew ba ka KHADC ka thaw ain halor ka ILP, ka dei kane kaba ka don ka jing ong – I JINGTIP BARIT I LONG IBA MYNSAW (A LITTLE KNOWLEDGE IS VERY DANGEROUS). Ia kane ka Bill – KHAD (As Adapted from the Bengal Eastern Frontier Regulation, 1873) Regulation, 2018 la phah sha u Governor ha ka 31 tarik October, 2018, ha ka jingshisha ka la dei tangba u Governor un Pynbna (Notify) ia ka traik bad ki jaka ba ka ILP kan treikam namar u Governor u la dep soi ha ka 22 tarik April, 1952 bad la mynjur (approve) u President ka Ri India ha ka 3 tarik May, 1952.

Hynrei namar ba la pynslem, kum u CEM ka KHADC bad u Secretary ka EC ka KHADC ngi la thep (filed) ia ka mokotduma (petition) sha ka Supreme Court badonburom, hynrei namar la kut noh ka por jong nga kum u CEM, ka kam ka la sah shiteng ha Supreme Court namar ka Executive Committee kaba hadien ka khlem buddien ia kane ka kam. Dei ha une u CEM uba thymmai mynta Bah Latiplang Kharkongor ba la pynkhie im biang ia kane ka kam, da kaba ki la pynkhreh ban phah ia ka jingsiew ia ki Lawyers ha Supreme Court, bad ban phah ruh ia ka Affidavit sa shisien na u Secretary ka EC.

Kaba sngewsih ka long ba ki MDC ka JHADC ha kato ka por kim shim la snoh kti lang ban thaw ia ka – JHAD (As Adapted from the Bengal Eastern Frontier Regulation, 1873) Regulation – kumta ba kan long lang kumjuh ha baroh ar jaka.

Ha kaba ia dei bad ka GHADC te ngam don ei ei ban ong, namar ka kham jwat khyndiat ba la weng ia ka jingpyntreikam ia ka Bengal Eastern Frontier Regulation, 1873 naduh ka por jong ka Sorkar Bilat; nga ieh ba ki riewstad riew-shemphang jong ka Garo Hills kiba kham khraw ban ia ngi kumba ka long mynta ba kin peit kumno ka dei ban leh.

Kumta, na ka liang kumba nga kren ha Madan Sutdent kumta ruh nga la dep ha ki kam.

Hynrei, mynta ka wan ka jingpynbna na u Home Minister ka Sorkar India, u Amit Shah, ba ki Jylla Shatei Lam-mihngi (North Eastern States) kiba don ILP ki lait na ka CAB bad kumjuh ruh kiba don ia ka 6th Schedule. Ngin jin da la long kiba donbok tam namar ngi don lang ka 6th Schedule bad ka ILP, hynrei mynta ngi don tang ka 6th Schedule khlem ka ILP te ka long kumba theh um ha ka ruh syiar.

Kaba iap tam ia ngi ka dei ka Meghalaya Residents Safety and Security Act, 2016 kaba da thoh shai kdar “to facilitate entry” ha ka jaka “to restrict entry”, kata, ba mynta ba la treikam ka CAB te la ia dei bha, ka bneng ha khyndew ia ki hynriew ki jaid niam ba la shah lehbein ha Bangladesh, Afganistan bad Pakistan kiba la dep rung bad don ha India haduh ka 31 December, 2014.

Halor kane ba ia ka MRSSA 2016 dei ban pynkylla (amend), lada ioh ILP ne khlem ioh ILP.

Khadduh, kane ka Sorkar Jylla ba la ialam khmat da u Conrad K. Sangma, Chief Minister, ka la dei ban phah thaw kloi kloi ia ka Bill halor ka ILP bad khot ia ka Special Session jong ka Meghalaya Legislative Assembly SHI SNGI bad mynjur ia kane ka Bill ILP da baroh 60 ngut ki MLA namar ym don ba pyrshah shuh mynta wat uwei ruh; bad leit rah sha u Amit Shah, Home Minister Badonburom ban leh ia kaba donkam kumba la leh ia ka Manipur, namar kam long ban pynduh ILP ia ka Meghalaya marwei.

Ngi dei ruh ban tip ba katkum ka CAB, ki ban ioh myntoi na ka CAB ki dei tang kito kiba la rung sha India tang haduh ka 31 tarik December, 2014 bad ym shuh kiba wan hadien ka 31 tarik December, 2014, kiba kumta kita ki briew na Bangladesh, Afganistan, Pakistan ki la don lypa mynta hapoh Ri India bad bun na ki ruh kiba la don ki case ha ki Kashari bapher.

Kumta, kane ka CAB kan long ka jingkyrkhu ia ngi lada kum ha kane ka por, da ka Sorkar hi kumba leh ka Sorkalr Manipur, kan shna ia ka Bill halor ka ILP bad leit dawa ia ka jingmynjur na Delhi kuba la kdew haneng, kiba dang ap ban ai ia kaba ngi dei hok ban ioh. U Prime Minister badonburom u Narendra Modi u dang kular shitrhem – NORTH EAST PEOPLE WILL BE PROTECTED.

Da ka ding, da ka snam, da ka iashoh iadat kam wan rah jingkyrkhu ia ka Jaidbynriew, u Blei na jrong U iohi iaphi kiba da leit khnang ban pom da ka wait iano iano tangba dei u dkhar, leit thang ia ka kali jongno jongno tang ban heh ia ka jingiakhih, nga tip ia kine ki buit barieh baroh, namarkata, lada ngi rwai na khmat – KATBA DANG TIP LA U TRAI NONGTHAW, KO RI JONG NGA PHAN YM LONG MRAW – katba na shadien kohnguh ia u Soitan ban rah da ka wait, da ka petrol, da ka um snam.

Kane ka dei ka jingthoh kaba khadduh jong nga, ngan ym mih shuh, ngan ym thoh ei ei shuh namar ngam ia hap ban iaid da kane ka lynti kaba yn long ka jingtim pynban ia ka jaidbynriew jong ngi namar u Blei U iohi kyndiang. Lada nud ban shoh ban dat ka dei ia kita kein kiba khang ia ka ILP.