Ka jingthoh ‘Vaccinated’ bad ‘Not Vaccinated’ ha ki kali kamai, ki dukan bad ki jaka trei

Nongpoh:Haba bud ryntih katkum ka hukum kaba la pynmih da ka Iingbishar ba don burom ka Meghalaya High Court of Meghalaya, kaba la pynmih mynha ka 23 tarik mynta u Bnai, kumta ka Deputy Commissioner, Ri Bhoi District, ka la pyntip paidbah ba baroh la ka long ia ki dukan, ki jaka trei bad ia ki kali kit nongleit nongwan, kiba kynthup ia ki local taxi, auto-rickshaw, ki sumo bad ki bos, ba ki dei ban tah ia ki kynja jingthoh kiba lah ban paw shynna bha ia ka kyntien ‘Vaccinated’ kaba mut ba ki la dep ban shah injek, da kaba pyni ia ki dur kaba kdew shai ba baroh ki trai bad ki nongtrei ki la ioh ia ka Injek iada COVID-19.

Ka la long kumjuh ia kito ki bym pat ioh ia ka Tika, ba ki dei ban tah ha ka jaka ba paw shynna bha ia ka kyntien “NOT VACCINATED” ha ryngkat ki kyrteng bad ki dur kaba kdew shai ba baroh ki trai bad ki nongtrei jong ka dukan/ jaka trei, haba kim pat dep ban ai Tika.

Na ka bynta jong kito ki bym pat dep ia ka Tika COVID-19, ki dei ban pyni da ka report jong ka RTPCR test lane ka jong ka RAT test kaba manla ka shiphew sngi.
Ki dukan lane ki kali ha kaba iadei bad ka jingthoh iaka kyntien VACCINATED lane NOT VACCINATED, ki dei ban da thoh shai, kaba lah ban iohi bha ha ryngkat ka jingtah ia ki dur.